„Ги повикувам да се борат кога, понекогаш, кон нив се постапува неправедно. Дури и во црквата, кога нивната служба, толку благородна, е сведена на ропство. Понекогаш за тоа се одговорни луѓето од црквата“, рече папата во видеото објавено за да се претстават молитвените намери на папата за февруари посветени на калуѓерките и жените посветени на Бога.
„Нека не се обесхрабруваат“, додаде 85-годишниот папа, кој постојано го осудува насилството и ропскиот однос кон жените.
Прашањето за калуѓерките кои извршуваат домаќински работи во служба на машката црковна хиерархија, особено на кардиналите и членовите на Куријата, веќе беше во центарот на јавниот интерес.
„Овие жени работат како слугинки за свештеници, бискупи и кардинали, каде што готват, чистат, перат облека, а се многу слабо платени“, изјави за АФП Луцета Скарафија, историчарка, коментаторка и поранешна директорка на списанието „Жени црква свет“.
„Ова се смета за нормално во црквата: жените мора да служат без да бараат ништо за возврат“, додаде Скарафија, авторка на книгата Феминистка и христијанка.
„Научени се да бидат почестени да им служат на свештениците. Тоа е начин на размислување“, заклучи таа.
