Новиот папа планира да носи крст за време на Патот на крстот, кој го означува патот на страдањето на Исус до Голгота, местото надвор од древниот Ерусалим каде што бил распнат Исус Христос. Неговиот претходник Франциско, кој почина на Велигденски понеделник минатата година, не го стори тоа. Во последниве години, тој мораше целосно да го прескокне Патот на крстот од здравствени причини.
Папата Лео, исто така, го продолжи ритуалот на миење нозе, означувајќи враќање на традицијата на обредот што Франциско го вршеше за бездомниците, затворениците и други маргинализирани лица. Носејќи бела ленена престилка, тој истури вода на нозете на 12 римски свештеници пред да ги исуши и да ги бакне.
Тоа е знак за имитирање на Христовиот гест кон апостолите според христијанската традиција. Доцна вчера попладне, Папата претседаваше со Мисата на Тајната вечера, во чест на последниот оброк на Христос со неговите ученици, во базиликата Свети Јован Латерански во Рим.
Со враќањето во базиликата Свети Јован Латерански, Лео го означи враќањето кон класичната форма на традицијата на миење нозе, која веќе ја почитувале претходните папи, но тој го цитираше Франциско во својата проповед. „Како што еднаш забележа папата Франциско: ова е должност што доаѓа од моето срце: го сакам ова. Го сакам и сакам да го правам затоа што Господ ме научи да го правам“, го цитираше Лео својот претходник.
„Додека човештвото е доведено на колена од толку многу брутални дела, да клекнеме и ние како браќа и сестри со угнетените“, продолжи Лео во својата проповед.
Задутре, се очекува Лео да го одржи традиционалниот велигденски благослов Урби ет орби, поздрав до „градот и светот“, за прв пат пред десетици илјади верници на плоштадот Свети Петар во Ватикан.
Лео беше избран за наследник на Франциско и 267-ми папа во историјата на католичката Црква во мај минатата година. Американскиот граѓанин е водач на околу 1,4 милијарди католици ширум светот.
