„Ова треба да биде предупредување и мислам дека мораме да реагираме“, изјави републиканскиот конгресмен Дон Бејкон од Небраска, додавајќи дека поентата не е во самиот пораз, туку во разликата меѓу кандидатите.
Демократката Тејлор Ремет, претседателка на синдикат и воен ветеран, победи во округот Форт Ворт против републиканката Ли Вомбсгенс, кандидатка што Трамп јавно ја поддржа, со разлика од 14 проценти.
Станува збор за изборна единица во која демократите немаат победено од 1991 година, а на претседателските избори Трамп ја освои со предност од 17 проценти.
Трамп пред гласањето на платформата Трут сошл ги повика поддржувачите во Тексас „да излезат на избори“ и да гласаат за „феноменалниот“ републикански кандидат на изборите за државниот сенат.
По поразот, тоа го нарече само „локална трка во Тексас“: „Јас немам врска со тоа.“
Сепак, силното поместување налево на гласачите во Тексас, кое следуваше по низа неодамнешни успеси на демократите, предизвика вознемиреност меѓу републиканците поради можните последици за националните меѓуизбори во ноември.
„Вонредните избори знаат да бидат непредвидливи и не мора нужно да ги одразуваат резултатите на општите избори“, напиша гувернерот на Флорида, Рон Десантис, на платформата Икс, коментирајќи ја победата на демократите во Тексас.
„Но едно поместување од вакви размери не може едноставно да се игнорира“, предупреди тој.
Гувернерот ја повика својата партија „реално да ја согледа политичката средина во пресрет на меѓуизборите во ноември“ — кога тесната републиканска контрола врз Конгресот ќе биде доведена во прашање, како и иднината на претседателството на Трамп.
Изборите во Тексас „несомнено се сигнал за тревога“ за републиканците, изјави професорот по политичка историја на Универзитетот Принстон, Џулијан Зелизер.
„Тоа значи дека постојат слабости што се последица на мандатот на Трамп. Колку се длабоки тие проблеми и колку долго ќе траат, засега е нејасно“, изјави тој за АФП.
Во Минесота, минатиот месец два лево ориентирани окрузи донесоа победа на демократските кандидати со неверојатни 95 проценти од гласовите.
На вонредните избори во декември во Тенеси, предноста на републиканскиот кандидат се намали за повеќе од 12 проценти во споредба со ноември 2024 година.
Демократите минатата година лесно обезбедија победи и на изборите за гувернер и за законодавните тела во Вирџинија.
Овие порази, заедно со нискиот рејтинг на Трамп во анкетите, сугерираат дека „демократите имаат голема можност“, дури и во сојузни држави што традиционално се наклонети кон републиканците, рече Зелизер.
Но дали тој тренд ќе продолжи до меѓуизборите?
„Очекувам дека ќе продолжи. Трамп не е особено брз кога станува збор за промена на политичкиот курс“, изјави тој.
Професорот додава дека многу Американци и понатаму имаат сериозни грижи околу трошоците за живот и дека сè повеќе се вртат против Трамп бидејќи се чини дека тој е повеќе фокусиран на надворешната политика и личните проекти, како неговата нова позлатена балска сала во Белата куќа.
Во десницата Трамп сè уште не се критикува гласно, но некои сепак почнаа, како поранешната конгресменка од Џорџија, Марџори Тејлор Грин.
Некогаш една од најжестоките поддржувачки на Трамп, Грин во јануари го напушти Конгресот и остро го критикуваше претседателот поради наводно напуштање на популистичката база.
„МАГА, мислам дека луѓето сега го сфаќаат тоа, беше голема лага“, изјави неодамна Грин. „Оние на кои МАГА навистина им служи во оваа администрација, тоа се големите донатори“, додаде таа.
Според повеќето аналитичари, Трамп и натаму располага со лојална и мотивирана база гласачи. Сепак, изборните резултати сугерираат дека неговата политичка коалиција станува сè потесна поради три проблеми.
Првиот е заморот на умерените гласачи од постојаните политички судири. Вториот е економското незадоволство, бидејќи инфлацијата и трошоците за живот остануваат високи. Третиот е расцепканоста на десницата, каде што се појавуваат поединци свесни дека Трамп ќе биде на власт уште три години и дека битката за нов лидер на десницата веќе започнала.
Според зборовите на научничката Сара Биндер од институтот Брукингс: „Трамп е исклучително ефикасен во мобилизацијата на своите најверни поддржувачи, но сè послаб во задржувањето на пошироката коалиција што е неопходна за победа на национално ниво.“
Се чини дека Трамп е свесен дека републиканците во ноември ги очекува тешка борба. Меѓуизборите секогаш се референдум за актуелниот претседател и, иако Доналд Трамп истакнува дека партијата на власт на меѓуизборите обично губи места, вели дека таа традиција треба да се прекине поради неговите досегашни „постигнувања“.
Секој поинаков резултат, тврди тој, би бил последица на лошо медиумско известување или изборна измама.
Во понеделникот ги повика федералните власти да преземат контрола врз изборите во околу петнаесет сојузни држави, повторувајќи ги своите тврдења за изборна измама од 2020 година.
„Таа приказна за измамите не е приказна што ќе ги одлучи овие меѓуизбори“, пишува Нејт Кон, главен политички аналитичар на Њујорк тајмс, и додава: „Проблемот за републиканците не е што губат избори, туку што го губат наративот. А кога партијата ќе го загуби наративот, обично ги губи и изборите.“
Она што е позитивно за републиканците е тоа што партијата, во пресрет на кампањата за меѓуизборите, располага со повеќе од 95 милиони долари, во споредба со само 14 милиони долари со кои моментално располагаат демократите.
