Портпаролот на авганистанската влада, Забиула Муџахид, потврди дека Пакистан извршил напади во Авганистан и дека тие, како што тврди, биле насочени кон цивили во провинциите Нангархар и Пактика.
Во објава на социјалната мрежа Икс, Муџахид изјави дека десетици луѓе, вклучувајќи жени и деца, биле убиени и ранети во нападот.
Портпаролот на владата ја обвини пакистанската војска за нападите.
Пакистанскиот министер за информации, Аталах Тарар, претходно денес на Икс напиша дека војската спровела „селективни операции базирани на разузнавање“ против седум кампови кои наводно им припаѓаат на пакистанските талибанци (ТТП).
Тој додаде дека цел на нападите бил и еден огранок на Исламската држава (ИСИС).
Бомбаш самоубиец, неколку часа пред денешните напади, нападна безбедносен конвој во округот Бану во северозападен Пакистан, при што загинаа двајца војници.
Тарар рече дека Пакистан има „убедливи докази“ дека неодамнешните напади ги извршиле бунтовници кои дејствувале „по налог на своето раководство и лица со седиште во Авганистан“.
Тој рече дека Исламабад постојано ги повикувал талибанските власти во Кабул да спречат напади од страна на милитантните групи, но не се преземени никакви конкретни мерки.
Тарар додаде дека Пакистан ја повикува меѓународната заедница да изврши притисок врз талибанските власти во Авганистан да ги исполнат своите обврски според прекинот на огнот, потпишан во Доха, и да не дозволат нивната територија да се користи против други земји.
Насилството на бунтовниците во Пакистан се зголеми во последниве години, а за бројни напади главно се обвинува ТТП и забранетите сепаратистички групи на Белуџит.
