Орбан рече дека денешните избори се празник на демократијата и им се заблагодари на гласачите кои го слушале за време на изборната кампања, пренесува весникот Маѓар Немзет.
„Унгарскиот изборен систем е најбезбеден во Европа. Одлуката на народот мора да се почитува“, рече Орбан, додавајќи дека доколку неговиот противник Петер Маѓар добие повеќе гласови, тој ќе го прифати резултатот и ќе му честита.
Зборувајќи за значењето на овие избори, Орбан рече дека тие се многу важни бидејќи меѓународниот контекст и опкружување се промениле.
„Гледаме дека во Европа нè очекува голема криза, не една, туку неколку, кои се акумулираат. Не е лесно за ниту една нација да го пронајде вистинскиот одговор на овие предизвици. Ни треба големо национално единство за да ја издржиме енергетската, финансиската и економската криза“, рече Орбан, повторувајќи дека очекува изборна победа.
Во Унгарија денес од 6 до 19 часот се одржуваат парламентарни избори на кои право на глас имаат повеќе од 8,1 милиони гласачи, а според анкетите на јавното мислење, главни ривали се партијата Фидес на актуелниот унгарски премиер Виктор Орбан и проевропската партија Тиса, предводена од Петер Маѓар.
