Зборувајќи во Сулисап, Орбан рече дека Украина, и покрај тоа што успеала да го рестартира нафтоводот, ги прекинала испораките на нафта за Унгарија од политички причини. Тој рече дека Будимпешта нема да прифати таква ситуација.
„Сè додека не пристигне нафта преку нафтоводот „Дружба“, нема да има пари за Украина“, рече тој на социјалната мрежа Икс.
Тој предупреди дека без отворање на стратешките резерви на Унгарија, цените на горивата би можеле да достигнат 1.000 форинти (2,64 евра) за литар до следниот понеделник.
„Не можеме да прифатиме да нè сметаат за будали“, нагласи тој, потсетувајќи дека Унгарија ги прекинала испораките на дизел за Украина и го информирала Брисел дека ќе го блокира и ќе стави вето на пакетот од 90 милијарди евра.
„Сè додека не стигне нафтата, нема да има пари. Ставот на Унгарија останува јасен: мир наместо ескалација и никаква поддршка за економската помош поврзана со Украина додека не се обнови транзитот на нафта“, додаде Орбан.
Нападот врз нафтоводот Дружба на 27 јануари го прекина транспортот на нафта до Унгарија и Словачка, а владите во Будимпешта и Братислава ја обвинија Украина за политичка злоупотреба на ситуацијата со спречување на продолжување на испораките на нафта. По прекинот на транспортот на нафта преку нафтоводот Дружба, Унгарија и Словачка одлучија да ги прекинат испораките на дизел гориво за Украина како одговор.
Европската унија не успеа да постигне договор за најновиот пакет санкции против Русија на состанокот на министрите за надворешни работи во Брисел во понеделник. Шефицата за надворешна политика на ЕУ, Каја Калас, го нарече исходот назадување, но вети дека работата ќе продолжи.
„За жал, не постигнавме договор за 20-тиот пакет санкции. Ова е назадување и порака што не сакавме да ја испратиме денес, но работата продолжува“, рече Калас, додавајќи дека се во тек контакти со властите на Унгарија и Словачка за подобрување на пакетот.
