„Џезот се роди од борба и непопустливо инсистирање на слободата на мислата, изразувањето и целосниот човечки глас. Некои од нас создаваат музика со децении, а таа историја сè уште нè обликува“, се вели во соопштението на Кукерс.
Центарот Трамп Кенеди претходно најави два новогодишни настапи на Кукерс како „ол стар џез септет што ќе го запали Театарот Терас“.
Ричард Гренел, долгогодишен сојузник на американскиот претседател, кој беше назначен за претседател на центарот од Трамп, рече дека ваквите бојкоти се „форма на синдром на пореметување“ и дека откажувањата се дело на уметници ангажирани од претходното раководство на институцијата. Тој претходно ги нарече откажувањата „политички трик“.
Листата на откажани концерти расте откако управниот одбор на Центарот ја објави промената на името овој месец, а републиканскиот претседател го наполни со сојузници за време на преземањето на власта претходно оваа година.
Минатата недела беше откажан Божиќниот џез концерт, а водителот на шоуто, музичарот Чак Ред, го припиша на промената на името. Њујорк тајмс објави дека Даг Вароне и Денсерс, њујоршка танцова група, откажале две претстави во април.
Демократите ја нарекоа одлуката на одборот на Центарот Кенеди да го додаде името на Трамп во институцијата нелегална, додека семејството на Џон Ф. Кенеди го осуди потегот како поткопување на наследството на убиениот претседател.
Одборот гласаше за преименување на уметничкото место во Меморијален центар за сценски уметности „Доналд Џ. Трамп и Џон Ф. Кенеди“, или скратено Центар Трамп Кенеди.
Трамп се обидува во својот втор мандат да го остави својот печат на Вашингтон и своето име на зградите. Неговите критичари велат дека тој ги компромитирал институциите со назначување лојални луѓе и заканувајќи се со финансирањето. Трамп вели дека се бори против она што го нарекува либерална пристрасност на институциите.
