„НИС ќе продолжи да обезбедува стабилно снабдување со нафта и нафтени деривати на домашниот пазар, дури и во тешки околности. Крајната цел е да се отстрани НИС од листата на санкции на Канцеларијата за контрола на странски средства (ОФАК) на Министерството за финансии на САД, што е процес кој не зависи од Србија. Се надеваме дека продолжувањето на разговорите на високо ниво меѓу САД и Русија ќе придонесе за напредок во целиот пакет американски санкции за руските компании, како и за договор што би можел позитивно да влијае на отстранувањето на неизвесноста во врска со Нафтената индустрија на Србија и отстранувањето на компанијата од листата на санкции“, изјави министерката за рударство и енергетика Дубравка Ѓедович Ханданович, пренесе Танјуг.
Таа истакна дека со досегашното одложување на санкциите, Србија успеала да ја зачува енергетската безбедност.
„И покрај сложените околности кои се надвор од наша контрола, обезбедено е рафинеријата да има доволно сурова нафта и да продолжи да работи, и ние сме благодарни на американската администрација за досегашното разбирање. Ситуацијата останува сложена и државата продолжува да вложува максимални напори и води активен дијалог и со американската и со руската страна“, нагласи Ѓедович Ханданович.
Таа, исто така, потсети дека Србија не придонела на никаков начин за воведување санкции врз НИС и дека тие се резултат на глобалната политика.
„Ќе продолжиме да се бориме со сите дипломатски средства за да обезбедиме стабилност во снабдувањето за нашите граѓани и економијата“, рече министерката.
