Преживеаните во регионот склон кон земјотреси се борат за основни средства, додека Обединетите нации и другите агенции предупредуваат на критична потреба од храна, медицински материјали и засолништа, а Светската здравствена организација (СЗО) итно апелира за 4 милиони долари.
Најновите последователни потреси следеа по два земјотреси што ја опустошија централноазиската нација, погодена од војна, сиромаштија и намалување на помошта. Талибанската администрација процени 2.205 смртни случаи и 3.640 повредени до четврток.
Земјотрес со магнитуда од 5,4 степени денес го погоди југоисточниот дел на длабочина од десет километри, објави ГФЗ, неколку часа по еден доцна синоќа.
Првиот земјотрес со јачина од 6 степени оваа недела, само неколку минути пред полноќ во неделата, беше еден од најсмртоносните во Авганистан, предизвикувајќи штета и уништување во провинциите Нангархар и Кунар.
Куќите таму претежно се изградени од камен и дрво, па затоа некои семејства претпочитаа да останат на отворено отколку да се вратат дома, како мерка на претпазливост од последователни земјотреси.
Свлечиштата и урнатините на клучните патишта го попречија доставувањето помош, соопшти СЗО, истовремено повикувајќи на дополнително финансирање за здравствена заштита и контрола на болести.
„Недостатокот на средства од најмалку четири милиони долари се заканува да ги одложи клучните активности“, се наведува во соопштението за медиумите, нагласувајќи ја потребата од меѓународна поддршка.
Издадено е и предупредување за ризик од болести што произлегуваат од преполни засолништа, небезбедна вода и несоодветно управување со отпад, додека приливот на Авганистанци неодамна депортирани од Пакистан го оптоварува кревкиот здравствен систем.
Талибанската влада на Авганистан побара итна помош од светот кратко време по катастрофата во неделата. Но, помошта е оскудна во земјата која е во голема мера игнорирана од светот откако талибанците ја презедоа власта во 2021 година.
Земјата се бори и со милиони раселени Авганистанци протерани од соседните Иран и Пакистан и со оние погодени од суша на север.
ОН, кои предупредија дека парите за помош на жртвите од земјотресот наскоро ќе ги снема, планираат да покренат итен апел за средства, изјави висок функционер во земјата.
„Имаме некои почетни средства, но сакаме да упатиме итен апел“, рече Кејт Кери, заменик-шеф на Канцеларијата на ОН за координација на хуманитарните работи во Авганистан.
