Доктор Ханс Клуге ги наведе високите стапки на вакцинација, крајот на зимата и помалку тешката природа на омикрон како причини за оптимизам. Обраќајќи им се на новинарите, тој рече: „Овој период на поголема заштита треба да се гледа како „прекин на огнот“ што може да ни донесе траен мир“.
Оваа најава доаѓа откако голем број европски земји ги укинаа сите епидемиолошки мерки. Претходно оваа недела, Данска стана првата земја во Европската унија која ги укина сите мерки, вклучително и носењето маски.
Иако случаите таму сè уште се релативно високи, властите велат дека вирусот повеќе не се квалификува како „критична закана“ со високи стапки на вакцинација што помагаат во заштитата од сериозни болести. Оттогаш Норвешка исто така најави укинување на мерките, а Шведска во четвртокот објави дека исто така ќе ги укине речиси сите мерки на 9 февруари.
„Пандемијата не е завршена, но влегуваме во сосема нова фаза“, изјави шведската премиерка Магдалена Андерсон за новинарите.
Д-р Клуге од СЗО во четвртокот ги повика европските нации да продолжат со кампањите за вакцинација. Но, тој рече дека е уверен дека континентот ќе биде во „подобра позиција … дури и со повирулентна варијанта“ од омикрон.
„Верувам дека е можно да се одговори на новите варијанти кои неизбежно ќе се појават без повторно инсталирање на мерките што порано ни беа потребни“, додаде Клуге.
Тој истакна дека околу 12 милиони нови случаи на вирусот биле откриени низ Европа минатата недела – што е најголем регистриран број – но рече дека официјалните лица не забележале значително зголемување на оние на кои им била потребна критична болничка нега.
Клуге повика на индивидуална одговорност, понатамошна заштита на ризичните групи и, како што рече, „драстично и бескомпромисно зголемување на споделувањето на вакцините преку границите“ за да се помогне во заштитата на целиот свет.
