Се очекува Нетанјаху да се консултира со својот кабинет и военото раководство во наредните денови за да добие поддршка за својот план, објавија медиумите. Информативниот портал инетњуз.ком цитираше висок функционер наводно близок до Нетанјаху, кој рече: „Коцката е фрлена, одиме на целосна окупација на Појасот Газа“.
Нетанјаху претходно објави дека ќе издаде „инструкции“ оваа недела за продолжување на војната во Појасот Газа. Во видео порака објавена во неделата, израелскиот премиер рече дека Хамас одбива да се согласи на договореното решение.
Напорите за обезбедување прекин на огнот и ослободување на заложниците преку индиректни разговори меѓу Израел и Хамас траат со месеци без резултати. Израелските сили моментално контролираат околу 75 проценти од Газа.
Израелските одбранбени сили (ИДФ) постојано се спротивставуваат на целосна окупација на Појасот Газа, предупредувајќи дека уривањето на сите тунели и бункери на Хамас може да трае со години, според весникот Тајмс оф Израел.
Воени лидери исто така предупредија дека офанзивата насочена кон заземање на цела Газа може да ги загрози животите на заложниците, за кои се плашат дека би можеле да бидат убиени штом ќе се приближат израелските трупи.
Според извештаите, Нетанјаху сега е подготвен да го прифати тој ризик. „Ќе има активности во областите каде што се држат заложниците“, рече функционерот цитиран од инетњуз.ком.
Досега, претежно крајно десничарски министри во владата на Нетанјаху повикуваа на целосна окупација на Појасот Газа.
