Според научниците, оваа година имало невообичаено голем број бубамари, особено на југ и југоисток, каде што милиони инсекти ги нападнале крајбрежните области што ги претпочитаат поради изобилството храна.
Плажата во селото Поинт Клир, во Есекс, била особено погодена, каде што локалните жители останале запрепастени. „Ги имаше насекаде“, вели еден локален жител. „Една слета на моето лице, други на моите кучиња“.
Минатиот четврток, рој бубамари го прекина крикет натпреварот помеѓу Англија и Индија на стадионот Лордс во Лондон. Вицекапетанот на англиската репрезентација Оли Поуп по натпреварот изјави: „Никогаш не сум доживеал нешто слично. Ова е прв пат и публиката да доживее нешто вакво“.
Хелен Рој, екологист и водечки британски експерт за бубамари во Центарот за екологија и хидрологија, изјави дека имало невообичаено голем број видови што се хранат со лисни вошки, како што е седумточкестата бубамара.
„Ова се должи на големиот број лисни вошки и топлото време. Луѓето ни пријавуваат многу случаи преку иРекорд како дел од националниот проект за следење на бубамари Истражување за бубамари во Велика Британија, што е одлично“, рече таа.
Таа ги повика луѓето да им помогнат на инсектите и другите животни оставајќи плитки садови со вода во своите градини за време на топлотниот бран. „Исто така, ги повикуваме луѓето да не ги отстрануваат лисните вошки од рози и други растенија за бубамарите да имаат доволно храна.“
Професорот по зоологија и раководител на Одделот за биологија на Универзитетот Оксфорд Тим Кулсон ги повика луѓето да „научат да ги сакаат бубамарите“: „Топлото време им овозможува размножување на лисните вошки бидејќи тие можат побрзо да го завршат својот животен циклус, а како што се забрзува нивниот циклус, така се забрзува и животниот циклус на бубамарите. Кога има многу лисни вошки, има храна за бубамарите. Тие се ефикасни предатори и природни непријатели на лисните вошки, кои можат да бидат сериозни штетници за многу видови растенија. Слично како што волците ја држат популацијата на елени под контрола во некои делови од светот, бубамарите го држат бројот на лисни вошки под контрола.“
#Ladybird swarm #essex pic.twitter.com/95cOR9kyW6
— Denise Jay (@DeniseJayWrites) July 10, 2025
Питер Браун, вонреден професор по екологија и заштита на природата на Универзитетот Англија Раскин и еден од организаторите на Истражувањето за бубамарите во Велика Британија, рече дека последната година со толку голем број бубамари била 1976 година, иако имало и други сезони со локализирано зголемување.
„Тоа лето, седумточкестите бубамари беа насекаде по плажите барајќи храна и луѓето мислеа дека се инвазивни, но не беа затоа што се автохтони за Велика Британија“, објасни тој.
Таа година, за време на најжешкото британско лето некогаш забележано, бубамарите ги преплавија градовите и селата низ целата земја, а беа пријавени и случаи на каснувања. Според Британското ентомолошко и природно-историско друштво, повеќе од 23 милијарди бубамари ги покриле јужните и источните брегови на Англија.
Топлото, суво време создало идеални услови за размножување на лисните вошки, што исто така довело до огромно зголемување на популацијата на бубамари кои се хранат со нив. Браун нагласи дека ова зголемување на бројот на бубамари треба да се смета за позитивен феномен: „Тоа е показател за функционален екосистем“.
