Исто така, Министерството изјави дека заплениле рекордни 3,6 милијарди долари во биткоини.
Финансискиот свет со нетрпение чекаше да открие кој стои зад историскиот грабеж, а сите очекуваа искусни хакери или банкари на високи позиции, пишува Телеграф.
Сепак, откриени се имињата на раперка од Тикток и нејзиниот сопруг магионичар. Њујорчанецот Илја „Дач“ Лихтенштајн (34) и неговата сопруга Хедер Морган (31) беа уапсени оваа недела на Менхетн под обвинение за перење пари. Парот потрошил дел од украдените пари во биткоини на злато, незаменливи токени (НФТ) и картички за подарок во Волмарт од 500 долари, соопштија обвинителите.
Лихтенштајн и Морган биле активни на социјалните мрежи, каде што таа се претставувала како раперка Резлкан, псевдоним што се појавил, како што објасни на својата веб-страница, како „комбинација од Џингис Кан и пица“. Хедер Морган е обвинета за перење милијарди долари во криптовалути украдени со хакирање на виртуелна менувачница во 2016 година.
Во едно видео објавено на социјалните мрежи, таа танцува пред њујоршката берза и се претставува како „крокодилот од Волстрит“. Во друго музичко дело вели дека „почитувањето на правилата е за будалите“.
Парот сега е обвинет за обид за перење 119.754 биткоини украдени откако хакер упаднал во менувачницата Битфинекс во 2016 година и иницирал повеќе од 2.000 неовластени трансакции. Претставници на Министерството за правда изјавија дека тогашните трансакции биле проценети на 71 милион долари во биткоини, но со зголемувањето на вредноста на најголемата криптовалута, вредноста сега надминува 4,5 милијарди долари.
Тоа е најголемата финансиска заплена од страна на Министерството за правда во историјата, рече заменик-јавната обвинителка Лиза Монако, додавајќи дека случајот покажал дека криптовалутите „не се безбедно засолниште за криминалците“. Илја Лихтенштајн и Хедер Морган се соочуваат со обвиненија за перење пари и измама на САД. Случајот сега е пред федералниот суд во Вашингтон.
Клучната трага што довела до нивно апсење може да лежи во затворањето на нелегалната платформа Алфа беј во 2017 година. Имено, владини претставници рекоа дека дел од парите биле префрлени во Алфа беј, што всушност е еден вид верзија на И-беј што се наоѓа на „дарк-вебот“.
Кога страницата била отстранета, на властите најверојатно им бил даден пристап до внатрешните записи за трансакциите на Алфа беј поврзани со криптовалутна сметка на име на Лихтенштајн, соопшти компанијата за следење дигитални валути Елиптик. Во соопштението, Битфинекс рече дека соработува со Министерството за правда на „утврдување на правото за враќање на украдените биткоини“.
Лихтенштајн и Морган исто така се обиделе да перат пари преку мрежа на криптовалути и тврделе дека парите, всушност, биле исплатени за стартапот на Морган, објави Министерството за правда.
Двојката сега е во домашен притвор, не смеат да тргуваат со криптовалути и се под електронски надзор. Обајцата имаат двојно американско-руско државјанство. Рекоа дека се свесни за страшните последици доколку се обидат да избегаат.
