Имамоглу, 55, се соочува со повеќе од 140 обвиненија, вклучувајќи за корупција и водење криминална организација. Обвинителите бараат затворска казна до 2.430 години, јави Би-би-си.
Тој и неговата Републиканска народна партија (ЦХП) негираат какво било кривично дело. Тие го обвинуваат турскиот претседател Реџеп Таип Ердоган и неговите сојузници за започнување репресија поради падот на популарноста на лидерот.
Пред судењето, кое започнува денес, Имамоглу беше широко оценет како еден од ретките политичари способни да го победат Ердоган, кој е на врвот на турската политика од 2003 година.
Имамоглу беше уапсен на 19 март 2025 година, кога полицијата, по покренување истрага под сомнение за корупција, го приведе градоначалникот на Истанбул и го однесе на сослушување пред судските органи.
Неговото апсење предизвика силни политички реакции и масовни протести во Истанбул, каде што илјадници поддржувачи на опозицијата се собраа на улиците, опишувајќи ја постапката против градоначалникот како политички мотивирана.
Имамоглу зададе пркосен тон пред судењето, во коментарите дадени за новинската агенција Ројтерс од неговиот правен тим минатиот месец, повикувајќи го Ердоган веднаш да распише избори.
Уште 407 поддржувачи на Имамоглу се изведени пред суд, обвинети за водење криминална корупциска мрежа предводена од опозицискиот лидер, кого обвинителите го опишуваат како нејзин „основач и лидер“.
Поранешниот градоначалник беше уапсен на денот кога беше именуван за лидер на ЦХП и нејзин претседателски кандидат за 2028 година. Оттогаш е задржан во затворскиот комплекс Мармара, каде што треба да се одржи неговото судење.
Неговото притворање предизвика најголеми улични протести во земјата во повеќе од една деценија, проследени со стотици апсења и полициски акции.
