Русија тукушто соопшти дека Украина се согласила да испрати тим во Белорусија на разговори за ставање крај на руската инвазија во земјата.
Киев ги „потврди“ планираните разговори во белорускиот регион Гомел, кој е блиску до границите и на Русија и на Украина, изјави за новинарите рускиот главен преговарач Владимир Медински.
Медински додаде дека страните сега одлучуваат за логистиката и точната локација на самитот, со „максимална безбедност“ за Украинците.
„Гарантираме дека рутата за патување ќе биде 100% безбедна. Ќе ја чекаме украинската делегација“, изјави рускиот главен преговарач.
Претходно разговорите за прекин на руските напади во Украина беа одложувани поради несогласувања околу локацијата на потенцијалниот самит.
Руски дипломати и воени претставници денеска пристигнаа во Гомел, град во Белорусија блиску до руската и украинската граница, соопшти во неделата Кремљ.
„Руската страна е подготвена за разговори во Гомел. Сега ги чекаме Украинците“, рече портпаролот на Кремљ, Дмитриј Песков. Тој тврдеше дека самата Украина го предложила Гомел како место за самитот.
Преговарачкиот тим е предводен од Владимир Медински, помошник на претседателот Владимир Путин и поранешен министер за култура. Тој рече дека Русите ќе чекаат во Гомел до 15 часот по локално време.
Сепак, Украина одби да испрати преговарачи, потврди портпаролот на претседателот Володимир Зеленски, Сергиј Никифоров. „Ние навистина разговаравме за таков формат (на разговори). Но преговарачите од Русија побараа украинската армија прво да го положи оружјето“, напиша тој на социјалните мрежи, додавајќи дека наводното барање е одбиено.
Никифоров ја обвини Русија дека и покрај тоа испраќа функционери во Гомел со цел „да ја префрли вината на Украина“ за саботирање на преговорите.
Никифоров рече дека Киев не сака да испраќа преговарачи во Белорусија бидејќи Русија ја користи нејзината територија за да организира напади врз Украина. „Подготвени сме да се сретнеме на која било неутрална територија“, рече тој.
И покрај тоа што Русите првично изјавија дека нивниот тим ќе остане во Белорусија до 15 часот по локално време, украинскиот претседател Володимир Зеленски денеска телефонски разговарал со својот белоруски колега Александар Лукашенко и побарал да се помести крајниот рок, според портпаролката на Лукашенко, Наталија Ајсмонт. Таа рече дека белорускиот лидер потоа разговарал со рускиот претседател Владимир Путин, кој се согласил да ги премести планираните преговори за подоцна.
Зеленски на социјалните мрежи потврди дека разговарал со Лукашенко, но не ги коментираше разговорите.
