Според него, рускиот претседател Владимир Путин е подготвен за преговори со украинскиот претседател Володимир Зеленски, со фокус на „гарантирање неутрален статус“ и „ветување дека на украинската територија нема да има оружје“.
Тоа се условите, додаде Песков, што ќе овозможат постигнување „демилитаризација и денацификација на Украина“ и ќе го елиминираат она што Русија во моментов го смета за „закана за безбедноста на руската држава и народ“.
„Претседателот ја формулираше својата визија за тоа што ние би очекувале од Украина за да ги решиме горливите проблеми. Тоа е неутрален статус и одбивање да се инсталираат и да се користат системи за оружје“, рече Песков.
Тој исто така изјави дека Путин е тој што ќе одреди кога би можеле да се одржат преговорите и додаде дека Русија ќе влезе во преговорите „само ако раководството на Украина е подготвено да разговара“.
„Сегашната операција има свои цели и тие мора да се постигнат. Претседателот рече дека сите одлуки се донесени и дека целите мора да се постигнат“, рече Песков.
Тој, исто така, истакна дека во случај Киев да се согласи со барањата на Путин, сегашната инвазија на Украина ќе биде запрена.
