„Ураниумот што го поседуваат сега е закопан, но ние го следиме, точно знаеме што имаат, а и тие тоа го знаат“, рече Хегсет на прес-конференција заедно со началникот на Генералштабот на американската армија, Ден Кејн.
„Или ќе ни го дадат (ураниумот) доброволно, или ние самите ќе го земеме доколку е потребно. Можеме да го направиме тоа на кој било начин“, рече Хегсет, додавајќи дека неговата земја го задржува правото да „користи други средства“, без да прецизира што конкретно мисли.
Американскиот министер за одбрана додаде дека Иран никогаш нема да има нуклеарни капацитети.
Кејн рече дека американските сили остануваат подготвени да продолжат со борбите во случај на прекин на примирјето и додаде дека САД ги постигнале своите цели – уништување на балистичките ракети и беспилотните летала на Иран, како и неговата морнарица и воено-индустрискиот комплекс.
„Го поздравуваме прекинот на огнот и се надеваме дека Иран ќе избере траен мир. Но, да бидеме јасни, прекинот на огнот е пауза и вооружените сили остануваат подготвени да ги продолжат борбените операции со истата брзина и прецизност што ја покажавме во текот на изминатите 38 дена, во случај на неуспешен прекин на огнот“, додаде генералот.
„Американските сили ја уништија способноста на иранскиот режим да им наштети на Американците и на американските интереси во годините што доаѓаат“, рече Кејн.
Според него, САД погодиле повеќе од 13.000 цели во Иран, вклучувајќи повеќе од 4.000 подвижни цели.
Американската војска уништи 80 проценти од одбранбените системи на Иран, напаѓајќи 1.500 одбранбени цели, повеќе од 450 складишта за балистички ракети, 800 складишта за беспилотни летала за еднократна употреба и 2.000 командни и контролни јазли, додаде Кејн.
