„Ако некој од многуте коментатори сè уште негува илузии, еве ви. Соединетите Американски Држави се наш непријател, а нивниот зборлест „миротворец“ сега целосно тргна по патот на војна со Русија“, напиша Медведев на Телеграм.
„Да, тој сè уште не се бори секогаш активно на страната на бандеровскиот Киев, но ова сега е негов конфликт, а не конфликт на сенилниот Бајден. Секако, тој ќе каже дека не можел поинаку, дека бил притиснат во Конгресот итн. Ова не ја менува главната поента: донесените одлуки се чин на војна против Русија. А сега Трамп целосно застана на страната на полудената Европа“, додаде тој.
„Но, во ова последно замавнување на нишалото на Трамп има јасен плус: можеме да ги гаѓаме сите бандеровски скривалишта со секаков вид оружје без да се заморуваме со непотребни преговори. И да бараме победа точно таму каде што е можно, на терен, а не на маса. Со уништување на непријателите, а не со склучување бесмислени „договори““, заклучи тој.
Синоќа, за прв пат во својот втор мандат, Трамп воведе санкции против Русија, а поврзани се со нафтените компании Лукоил и Роснефт.
Американското министерство за финансии, кое ги издаде санкциите, изјави дека е подготвено да преземе понатамошни чекори и ја повика Москва веднаш да се согласи на прекин на огнот во војната на Русија во Украина, која започна во февруари 2022 година.
„Со оглед на одбивањето на претседателот Путин да ја заврши оваа бесмислена војна, министерството воведува санкции врз двете најголеми руски нафтени компании кои ја финансираат воената машина на Кремљ“, рече американскиот министер за финансии Скот Бесент.
„Ги охрабруваме нашите сојузници да ни се придружат во почитувањето на овие санкции“, додаде тој. Санкциите претставуваат голема промена во политиката на Трамп, кој не воведе санкции против Русија поради војната, туку се фокусираше на трговски мерки.
На пример, тој воведе дополнителна царина од 25 проценти на стоки од Индија затоа што купува поевтина руска нафта. Тој не примени такви мерки против Кина, другиот голем купувач на руска нафта.
