Станува збор за едно од најголемите корпоративни спојувања во историјата на приватниот сектор, со кое најбогатиот човек во светот дополнително ја зајакнува својата амбиција да доминира во областите на вештачката интелигенција и вселенските технологии, а новата компанија би била највредната приватна компанија во светот.
Аквизицијата на иксАИ беше потврдена во соопштение објавено на веб-страницата на Спејсекс, кое беше лично потпишано од Маск, потврдувајќи го претходниот извештај на агенцијата Блумберг њуз. Според извори запознаени со трансакцијата, Спејсекс беше проценет на трилион долари, додека иксАИ беше проценета на 250 милијарди долари.
Вработените беа информирани за спојувањето и вкупната проценка на вредноста на новата компанија во интерен меморандум. Трансакцијата се спроведува исклучиво преку размена на акции, а се очекува вредноста на секоја акција да изнесува 526,59 долари, според изворите, кои побараа да не бидат именувани бидејќи информациите сè уште не се јавни.
Во соопштението, Спејсекс изјави дека целта на аквизицијата на иксАИ е создавање на „најамбициозниот, вертикално интегриран иновативен систем на Земјата и пошироко“, кој ќе ги обедини вештачката интелигенција, ракетните технологии, вселенскиот интернет, директните мобилни комуникации и глобалната платформа за размена на информации во реално време.
И покрај спојувањето, Спејсекс сè уште планира иницијална јавна понуда на акциите (ИПО) подоцна оваа година. Претходно се проценуваше дека тоа излегување на берза би можело да собере до 50 милијарди долари, што би била најголемата јавна понуда на акции во историјата.
Објаснувајќи ја стратешката логика на спојувањето, Маск истакна дека во период од две до три години, најевтиниот начин за извршување АИ-компјутерски операции ќе биде токму во вселената. Според него, таквата ефикасност ќе овозможи брза обука на напредни модели на вештачка интелигенција и обработка на огромни количини на податоци, што би можело да доведе до значајни научни и технолошки откритија.
Во согласност со овие планови, Спејсекс аплицираше за одобрение за лансирање до милион сателити во орбитата на Земјата. Компанијата веќе генерира значителни приходи од својата сателитска мрежа Старлинк, која има повеќе од 9.000 активни сателити и во моментов генерира повеќе приходи од лансирањата на ракети.
Спојувањето дополнително ги испреплетува многуте деловни потфати на Маск. Откако го купи Твитер кон крајот на 2022 година и го преименува во Икс, Маск веќе ја спои таа платформа со иксАИ во договор вреден 33 милијарди долари. иксАИ, која го развива и четботот Грок, троши околу милијарда долари месечно, што го прави исклучително капитално интензивен проект.
За разлика од некои други потфати на Маск, Спејсекс се смета за негов најуспешен и најстабилен бизнис. Тоа е единствената американска компанија која рутински транспортира астронаути до Меѓународната вселенска станица и назад, а во исто време е клучен партнер на НАСА и Министерството за одбрана на САД.
