„Срушивме политичка династија. Му посакувам на Ендру Куомо се најдобро во неговиот приватен живот, но нека вечерва биде последен пат кога ќе го изговорам неговото име додека ја свртуваме страницата на политиката што ги напушта многумината и им служи само на малкумината“, рече Мамдани, додека публиката го прекинуваше со овации.
Во својот говор, тој им се заблагодари на „следната генерација њујорчани“ и ги повтори клучните точки од својата платформа, вклучувајќи бесплатни и брзи автобуси, замрзнување на киријата за одредени објекти и државни продавници за храна. „Ќе се бориме за вас, бидејќи сме дел од вас.“
„Победивме затоа што жителите на Њујорк си дозволија да се надеваат дека невозможното може да се постигне“, рече тој.
Потоа му се обрати директно на американскиот претседател Доналд Трамп, со порака што предизвика најгласен аплауз вечерта. „Ако некој може да ѝ покаже на нацијата, која Доналд Трамп ја издаде, како да биде победен, тоа е градот што го изроди. Вака не го запираме само Трамп – вака го запираме следниот. Доналд Трамп, бидејќи знам дека гледаш, имам четири збора за тебе: зголеми јачина на звук.“
Mamdani: So Donald Trump, since I know you’re watching, I have four words for you: Turn the volume up. pic.twitter.com/HE2Pr7EFgh
— Acyn (@Acyn) November 5, 2025
Заврши со пораката: „За да стигнеш до кој било од нас, ќе мора да поминеш низ сите нас.“
Трамп брзо одговори на својот профил на Трут соушл со кратка порака: „…И ТАКА ЗАПОЧНУВА!“
Демократот Зохран Мамдани, кој се опишува себеси како „најлошиот кошмар на Трамп“, е избран за нов градоначалник на Њујорк.
Мамдани е првиот муслиман, првиот јужноазиец и најмладиот човек во последните 100 години избран за градоначалник на Њујорк. Според податоците од Изборниот одбор на Њујорк, на овогодинешните избори гласале повеќе од два милиони луѓе. Пред четири години, излегле помалку од 1,15 милиони гласачи.
