Средбата се одржува на барање на Мамдани, само неколку недели по изборите на кои Трамп се закани со задржување на федералните средства за Њујорк ако Мамдани победи, објави Си-ен-би-си.
Мамдани, 34-годишен демократски социјалист, изведе едно од најголемите политички изненадувања во годината. Во јуни, тој ја шокираше американската јавност со победата над поранешниот гувернер на Њујорк, Ендру Куомо, на демократските прелиминарни избори, само за повторно убедливо да го победи на општите избори овој месец. Мамдани ќе го замени Ерик Адамс на местото градоначалник.
Иако го поддржуваше Куомо пред изборите, Трамп сега се согласи на средбата. Тој ја објави веста на својата социјална мрежа Трут соушл.
„Комунистичкиот градоначалник на Њујорк, Зохран „Кваме“ Мамдани, побара средба“, напиша Трамп. „Се договоривме овој состанок да се одржи во Овалната соба во петок, 21 ноември. Понатамошни детали ќе следат!“
Мамдани, кој се опишува себеси како демократски социјалист, ќе стане првиот муслимански градоначалник на Њујорк и најмладата личност што ја извршува оваа функција од 19 век. Левичарот победи на изборите за градоначалник на Њујорк на 4 ноември и ќе ја преземе функцијата на почетокот на годината.
Тимот на Мамдани изјави дека состанокот е нормален дел од транзицијата на власта и дека ќе се разговара за клучни прашања за жителите на Њујорк.
„Како што е вообичаено за новата градоначалничка администрација, новоизбраниот градоначалник планира да се сретне со претседателот во Вашингтон за да разговара за јавната безбедност, економската сигурност и агендата за прифатливост за која гласаа над еден милион жители на Њујорк пред само две недели“, изјави портпаролката Дора Пекец.
Самиот Мамдани ги разјасни своите намери во емисијата на Крис Хејс на Ем-ес нау.
„Само сакам да имам отворен разговор со претседателот за тоа што всушност значи да се залагаш за жителите на Њујорк и начинот на кој жителите на Њујорк се борат да си го дозволат животот во градот“, рече тој, додавајќи дека трошоците за живот се причината зошто многу жители на Њујорк гласаа за Трамп.
„И тоа е нешто што продолжи само во последните неколку месеци од оваа година, каде што слушаме за проблеми со грижата за децата, проблеми со киријата, проблеми со струјата, па дури и со самото качување во автобус“, заклучи Мамдани.
