„Потребни ни се нов обем и нова брзина во нашиот пристап за да ја завршиме фрагментацијата што ја ослабува и ризикува да ја понижи Европа“, изјави Емануел Макрон пред деловните лидери во Антверпен во Белгија, пренесоа француските медиуми.
Францускиот претседател уште еднаш ја изнесе идејата за „еврообврзници“, заеднички европски обврзници за финансирање големи инвестиции и за одржување на Европа конкурентна со Пекинг и Вашингтон.
„Ако сакаме да инвестираме доволно во одбраната и вселенската безбедност, чистите технологии, вештачката интелигенција и квантното пресметување и да ја трансформираме нашата продуктивност и конкурентност, единственото решение е да издадеме заеднички долг“, додаде Макрон.
Идејата за заеднички европски долг ја застапува Франција со години, но други земји, вклучувајќи ја и Германија, постојано ја отфрлаат.
„Никогаш не сме живееле во ваков период. Затоа, мора да прифатиме преземање клучни мерки кои не се многу вообичаени во традиционалниот европски сет на мерки“, рече Макрон.
Францускиот претседател рече дека Европа е во вонредна ситуација и додаде дека сите треба да бидат свесни за тоа бидејќи наскоро ќе биде предоцна.
Макрон, исто така, ги повика земјите кои се подготвени да ги спроведат реформите на единствениот европски пазар предложени од Комисијата да ја зајакнат соработката со цел што поскоро да се постигне напредок.
Оваа зголемена соработка претходно беше поддржана и од претседателката на Европската комисија, Урсула фон дер Лаен.
