Рускиот претседател Владимир Путин и неговиот американски колега Доналд Трамп вчера разговараа во пресрет на средбата на Трамп со украинскиот претседател Володимир Зеленски.
Портпаролот на Кремљ Дмитриј Песков изјави дека многу наскоро е планиран уште еден телефонски разговор. Песков одби да коментира за идејата за слободна економска зона во Донбас или за судбината на нуклеарната централа Запорожје, со која управува Русија, велејќи дека Кремљ ја смета за несоодветна.
Запрашан за коментарите на советникот за надворешна политика на Путин, Јуриј Ушаков, дека Украина треба брзо да донесе одлука за територијата во Донбас, Песков рече дека Киев треба да ги повлече своите војници од деловите од регионот што сè уште ги контролира.
„Зборуваме за повлекување на вооружените сили на режимот од Донбас“, рече Песков. На прашањето дали ова важи и за регионите Запорожје и Херсон, тој одби да даде детали.
Русија моментално контролира една петтина од Украина, вклучувајќи го и Крим, кој го анектираше во 2014 година, околу 90 проценти од Донбас, 75 проценти од регионите Запорожје и Херсон, како и помали делови од регионите Харков, Суми, Николаев и Дњепропетровск, според руските проценки.
Москва ги присвојува регионите Донбас, Запорожје и Херсон, иако овие региони се дел од Украина. Песков рече дека не се разгледува телефонски разговор меѓу Путин и Зеленски.
