„Ескалацијата нема да донесе прекин на огнот или мир. Ова ќе се постигне само преку преговори, имено преку континуирани напори предводени од регионалните партнери“, напиша Кошта денес на мрежата Икс.
Тој исто така истакна дека таргетирањето на која било цивилна инфраструктура е нелегално и повторно го повика Иран да ги запре нападите врз земјите во регионот и да го отвори виталниот Ормуски теснец.
„Секое таргетирање на цивилната инфраструктура, како што се енергетските инсталации, е нелегално и неприфатливо. Ова важи за војната на Русија во Украина и важи насекаде“, напиша Кошта.
Тој додаде дека иранското цивилно население е главната жртва на иранскиот режим, а исто така е и главната жртва на засилената воена кампања.
Кошта рече дека во својот неодамнешен разговор со иранскиот претседател Масуд Пезешкијан, нагласил дека Европската Унија го повикува Иран веднаш да ги прекине нападите врз земјите во регионот и да дозволи враќање на целосната слобода на навигација низ Ормускиот теснец.
Кошта не спомена ниедна друга земја. Американскиот претседател Доналд Трамп вчера го повтори рокот даден на Иран за постигнување договор, продолжувајќи го за еден ден до вторник вечерта и предупредувајќи дека доколку нема договор, ќе видат „уривање на мостови и електрани низ целата земја“.
