Видливо потресен и на работ на солзи, Кимел рече „никогаш немав намера да ја омаловажувам смртта на Чарли Кирк“, објави Скај њуз.
„Не мислам дека има нешто смешно во тоа“, рече тој, видливо емотивен. „Ниту пак имав намера да обвинам која било специфична група за постапките на очигледно длабоко растроена личност. Тоа всушност беше спротивното на она што се обидував да го кажам.“
Кимел е обвинет дека беше „навредлив и нечувствителен“ откако ги обвини Доналд Трамп и неговите сојузници за искористување на убиството во својата емисија „Џими Кимел во живо“. Во својата емисија кога се врати во вторник вечерта, Кимел рече дека разбира зошто неговите забелешки „изгледале или лошо темпирани или нејасни, или можеби и двете“.
Коментарите што доведоа до суспензијата беа дадени минатата недела. „За време на викендот поминавме некои нови ниски точки со бандата МАГА која очајно се обидува да го прикаже ова дете кое го уби Чарли Кирк како нешто друго освен еден од нив и прават сè што можат да освојат политички поени“, рече тој тогаш.
Свртувајќи се кон Трамп, тој додаде: „Ова не е начин на кој возрасен човек тагува за убиството на некој што го нарекува пријател. Ова е начин на кој четиригодишно дете тагува за златна рипка.“
Повторно на работ на солзи, Кимел ја пофали вдовицата на Кирк, Ерика, за простувањето на убиецот на нејзиниот сопруг на комеморацијата, нарекувајќи го „несебичен чин на милост… што длабоко ме трогна“. За разлика од неа, забележа тој, Трамп на комеморацијата порача: „Ги мразам моите противници и не им посакувам добро.“
Трамп: Не можам да верувам дека го вратија
По негативните реакции за неговото суспендирање, Дизни го најави неговото враќање во емисијата на својата мрежа Еј-би-си, иако двата главни оператори рекоа дека сепак нема да ја емитуваат. Трамп ја поздрави суспензијата, но потегот беше критикуван од холивудските ѕвезди и високи демократи, вклучувајќи го и Барак Обама.
Во објава на својата платформа Трут соушл пред емисијата, Трамп рече дека „не може да поверува“ дека Еј-би-си го врати Кимел, нарекувајќи го „огранок на демократите“ и најави понатамошни акции.
„Белата куќа беше известена од Еј-би-си дека неговата емисија е откажана! Нешто се случило во меѓувреме, бидејќи неговата публика ја НЕМА, а „талент“ никогаш не ни имал. Зошто би сакале да вратат некој што се справува толку лошо, кој не е смешен и кој ја става мрежата во опасност глумејќи 99% позитивно демократско ЃУБРЕ“ напиша Трамп.
„Мислам дека ќе го тестираме Еј-би-си на ова. Да видиме што ќе се случи. Минатиот пат кога ги нападнав, ми дадоа 16 милиони долари. Ова звучи уште попрофитабилно“, додаде Трамп.
Самиот Кимел ги критикуваше филијалите на Еј-би-си кои ја повлекоа неговата емисија од програмата, велејќи: „Не е легално. Не е американски“. Тој исто така им се заблагодари на оние што го поддржаа, додавајќи: „Потребна е храброст да се зборува против оваа администрација. Тие го направија тоа и заслужуваат пофалба за тоа“.
