Најновите снимки од севернокорејските државни медиуми покажуваат 50 лансирни системи со калибар од 600 мм наредени во седум реда на плоштад. Секое возило со четири оски носи пет ракетни цевки. Фотографиите го покажуваат Ким во црна јакна како излегува од мобилен лансер додека илјадници луѓе мавтаат со севернокорејски знамиња кон него. Една фотографија го покажува како се смее зад воланот.
Државната новинска агенција КЦНА објави дека Ким „лично го возел лансирното возило за да го провери оружјето, симбол на апсолутна моќ, наредено на плоштадот каде што ќе се одржи славниот Партиски конгрес“.
Церемонијата се одржа вчера пред Културниот центар „25 април“ во Пјонгјанг за работниците во индустријата за муниција кои пристигнаа на претстојниот Деветти Партиски конгрес.
Ким рече дека ракетите од 600 мм, двојно поголеми од оние во повеќето повеќекратни ракетни лансери, се моќни како и балистичките ракети со краток дострел. Тој рече дека употребата на вештачка интелигенција во системите за наведување ги става во посебна класа.
„Ниедна друга нација нема таков систем на оружје“, рече Ким, според државната новинска агенција КЦНА. Тој додаде дека оружјето „целосно ја променило улогата и разбирањето на артилеријата во современото војување“.
Ова не е прв пат Ким да ги пофали лансерите од 600 мм. Кон крајот на 2022 година, неговиот режим прикажа 30 лансери со иста големина, но на гасеници, при што секој носел по шест ракети. Според тогашните извештаи на КЦНА, ракетниот систем ја има цела Јужна Кореја во својот дострел и може да биде опремен со тактички нуклеарни боеви глави.
Меѓународните набљудувачи проценуваат дека Северна Кореја поседува околу 50 нуклеарни боеви глави, со доволно материјал за изградба на уште 30 до 40. Покрај повеќекратните ракетни системи, Пјонгјанг има и голем број други системи за испорака на нуклеарно оружје, од интерконтинентални балистички ракети што можат да стигнат до САД до оружје со краток дострел за употреба на Корејскиот Полуостров.
Пјонгјанг често прикажува ново оружје пред партиските собири, важни настани и годишнини. Ким најави дека во наредните денови може ќе се прикаже и друга воена опрема.
„Деветтиот конгрес на нашата Партија јасно ќе го дефинира планот и целта на следната фаза за зајакнување на одбранбените капацитети“, рече Ким, повикувајќи ги развојните инженери и работниците во производството на муниција да „работат поупорно на извршувањето на стратешкиот план на партијата“.
