„Владимир Путин, рускиот диктатор, ја уништува Украина повеќе од три години и не покажува никаков знак дека сериозно размислува за напорите за прекин на огнот. Кина стана негов најважен сојузник во овој конфликт“, пишува британскиот весник.
Калас рече дека кинеската влада е клучен фактор што ја овозможува војната.
Таа за Економист изјави дека Русија и Кина биле „многу отворени“ за своите намери. За време на разговорите меѓу кинескиот лидер Си Џинпинг и Путин во Москва во 2023 година, Си рече дека заедно ќе донесат „промени што не се видени сто години“, кинеска фраза што се однесува на падот на светскиот поредок во кој доминира Америка.
„Прашање е дали им веруваме“, вели Калас. Премногу често, забележа таа, западните носители на одлуки биле изненадени затоа што го гледаат светот низ сопствената „демократска призма“.
Потсетувајќи се на разговорот што го водела со кинескиот министер за надворешни работи Ванг Ји, Каја Калас вели: „Неговата порака беше дека не е во нивен интерес да ја запрат оваа војна (во Украина) бидејќи тогаш вниманието на Америка би се насочило кон Кина“.
Таа исто така спомена разговори со аналитичари од јапонски истражувачки центар кои ѝ рекле дека „војната во Украина не е особено популарна во Кина“ и дека кинеските лидери мора да „му објаснат на својот народ зошто тие се клучни во овозможувањето на оваа војна“. Тие сакаат јасно да стават до знаење, додаде таа, дека „тоа е во интерес (на Кина)“, за да може вниманието на Америка да се задржи на Европа.
Економист забележува дека Кина била претпазлива во врска со поддршката на Русија на почетокот на војната, одбивајќи да испраќа големи пратки готова муниција или смртоносна помош. Но, сега се чини дека пренесува сè повеќе клучни компоненти за оружје и цивилни дронови. Економски, двете земји се поблиски од кога било досега. Трговијата нагло порасна откако Кина ги замени западните партнери на Русија. Кина купува руска нафта и гас, додека за возврат испраќа стоки за широка потрошувачка и технологија (од кои некои имаат и воена примена).
Во исто време, истакнува весникот, американската поддршка за Украина е намалена. На почетокот на својот втор мандат, Доналд Трамп ги суспендираше испораките на оружје (иако некои оттогаш се обновени) и го поддржа предавањето на дел од украинската територија на Русија како дел од евентуален договор за прекин на огнот.
Тајван, кој долго време се потпираше на американската поддршка за да ја одврати кинеската инвазија, се плаши дека Трамп може да го омекне својот став и во неговиот случај.
Каја Калас признава дека предвидливоста на која Европа некогаш се потпираше во односите со Америка „веќе не постои“ под водство на Трамп. Но, таа тврди дека европското почитување на меѓународните правила и принципите на слободна трговија се вистинската стратегија во свет на непредвидливи автократи.
Според Економист, на денешната средба меѓу Си и Трамп во Јужна Кореја, се очекува кинескиот лидер да изврши притисок врз американскиот претседател да ја ослабне американската поддршка за Тајван.
„Европа е сè уште онаа што верува во слободна трговија“, нагласи Калас, посочувајќи на неодамнешните напори за склучување договори како оној со јужноамериканскиот трговски блок Меркосур. Проблемот со кој се соочува е што многу од противниците и сојузниците на Европа повеќе не сакаат да играат според правилата.
