Неговите коментари доаѓаат пред неформалниот состанок на Европскиот совет во Копенхаген, каде што се очекува ЕУ да разговара за таканаречен „ѕид против дронови“ како одговор на упадите на дронови кои се поврзуваат со Русија или други актери. О’Лири верува дека решението е многу поедноставно. „Зошто да не ги соборуваме овие дронови?“, праша тој во едно интервју, повлекувајќи паралела: „ако руски воен авион прелета над воздушниот простор на НАТО“.
Тој потсети на неодамнешните инциденти што предизвикаа хаос во воздушниот сообраќај. „Нашите операции беа прекинати пред три недели кога дронови летаа над Полска, а полските аеродроми беа затворени четири часа“, рече тој, осврнувајќи се на инцидент што ѝ се припишува на Русија. „Минатата недела, данските аеродроми беа затворени околу два часа“, додаде тој, коментирајќи ги упадите на аеродромите во Копенхаген и Алборг, каде што сторителот сè уште не е идентификуван. „Тоа е нарушувачки фактор и повикуваме на акција“, додаде тој.
И покрај сè поголемата потреба за заштита на европските аеродроми, О’Лири е исклучително скептичен кон идејата за „ѕид против дронови“. „Мислам дека ѕид против дронови нема да има никаков ефект. Дали мислите дека Русите всушност не можат да лансираат дрон од внатрешноста на Полска?“, рече О’Лири. Иницијативата беше ставена во центарот на одбранбениот план „Надзор на источниот блок“ од страна на комесарот за одбрана Андриус Кубилиус, со цел да се заштити континентот од растечките безбедносни закани.
Пред самитот во Копенхаген, шефот на нискобуџетната авиокомпанија не штедеше зборови на критика на сметка на веродостојноста на европските планови.
„Немам доверба во европските лидери кои седат, пијат чај и јадат бисквити“, изјави тој. „Ако не можете да ги заштитите ниту прелетите над Франција, какви се шансите тие да нè заштитат од Русија?“, додаде тој, алудирајќи на откажувањето на рутите над Франција за време на штрајковите на контролата на воздушниот сообраќај во земјата.
„Немам доверба во фон дер Лаен. Таа е бескорисна и треба да се повлече“, рече тој.
