Договорите вклучуваат нови јуришни хеликоптери и оклопни возила, според Агенцијата за соработка во одбраната и безбедноста на САД (ДСЦА).
Планираните договори со Израел вклучуваат 30 јуришни хеликоптери „Апачи“ и соодветна опрема во вредност од нешто помалку од 3,8 милијарди долари, 3.250 лесни тактички возила во вредност од 1,98 милијарди долари, опрема за оклопни транспортери во вредност од околу 740 милиони долари и лесни повеќенаменски хеликоптери во вредност од околу 150 милиони долари.
САД се најголемиот сојузник на Израел кога станува збор за воена поддршка и продажба на оружје.
Стејт департментот исто така одобри купување на 730 ракети за воздушна одбрана „Патриот“ и сродна опрема во вредност од 9 милијарди долари од страна на Саудиска Арабија. ДСЦА соопшти дека за тоа го известила Конгресот на САД.
Објавата за купување оружје доаѓа во услови на зголемени тензии на Блискиот Исток.
Американскиот претседател Доналд Трамп постојано му се закануваше на Техеран со воени напади во последните недели, вклучително и поради насилното задушување на неодамнешните протести во Иран. Во исто време, тој го зголеми военото присуство на САД на Блискиот Исток.
