Израелскиот КОГАТ соопшти дека владата одобрила механизам со кој ќе се зголеми количината на хуманитарна помош со тоа што ќе се дозволи влез на стока во Газа преку приватниот сектор.
Агенцијата соопшти дека ова се однесува на основни прехранбени производи, храна за бебиња, овошје и зеленчук и хигиенски производи.
„Целта е да се зголеми обемот на помош што влегува во Појасот Газа, а воедно да се намали зависноста од помошта собрана од Обединетите нации и меѓународните организации“, соопшти КОГАТ.
Ројтерс пишува дека сè уште не е јасно како би функционирале ваквите операции, со оглед на уништувањето на Газа.
Палестински и официјални претставници на ОН предупредуваат дека палестинската енклава има потреба од 600 камиони хуманитарна помош дневно за да ги задоволи основните потреби на населението. Израел го дозволуваше тој број пред војната.
Фотографиите и видеата од изгладнети Палестинци, вклучувајќи деца, го шокираа светот во последните недели, како и видеото од изгладнет израелски заложник објавено од Хамас во неделата.
Како одговор на меѓународните критики, Израел минатата недела објави чекори за зголемување на помошта за Газа, како што се делумни прекини на огнот, дозволување воздушни транспорти и заштита на коридорите за испорака.
Хамас објави дека е подготвен да се координира со Црвениот крст за доставување помош до заложниците во Газа доколку Израел отвори коридори и ги запре воздушните напади за време на дистрибуцијата на помошта.
Обединетите нации проценуваат дека Израел убил повеќе од илјада луѓе од мај додека барале храна, повеќето од нив во близина на дистрибутивните центри.
