Државната телевизија ИРИБ њуз издаде соопштение во кое им се заканува на потенцијалните демонстранти со уште поостар одговор отколку за време на протестите кон крајот на декември и почетокот на јануари, во кои, според американски активисти за човекови права во Иран (ХРАНА), беа убиени повеќе од 7.000 луѓе, пренесува Дпа.
Демонстрациите, првично предизвикани од тешката економска криза, беа најзначајните немири во земјата во последните години. Тајната служба објави дека ќе ги гони „предавниците“ 24 часа на ден. Според соопштението, „злиот непријател“ поттикнува страв и улични немири затоа што не успеал да ги постигне своите цели на бојното поле.
Иранскиот Корпус на исламската револуционерна гарда (ИРГК) претходно изјави дека има намера да го држи Ормускиот теснец, клучна бродска линија за светските резерви на нафта, затворен за сообраќај.
Командниот центар на елитната единица, според новинската агенција Фарс, изјави дека ги следи упатствата на новиот врховен лидер на Иран, Моџтаба Хамнеи. Сите танкери и бродови што пловат низ Ормускиот теснец мора да се придржуваат кон иранските прописи заради сопствена безбедност, се додава.
Гардата исто така изјави дека ќе продолжи да напаѓа „со полна сила“ врз американски и израелски цели во регионот.
Транспортот низ теснецот, околу 55 километри широк воден пат помеѓу Иран и Оман, практично колабираше поради иранските напади врз комерцијални бродови, при што во последните денови беа погодени неколку бродови.
Неможноста за транспорт на нафта низ теснецот предизвикува сериозна нестабилност на глобалниот енергетски пазар и ги зголемува цените на нафтата и бензинот.
