Министерот за надворешни работи Абас Аракчи на 27 март рече дека Иран му доставил официјален писмен одговор на Трамп преку Оман, тврдејќи дека Техеран нема да води директни преговори се додека е во сила кампањата за „максимален притисок“ на Трамп.
„Овој официјален одговор вклучува писмо во кое нашата позиција во однос на моменталната ситуација во писмото на Трамп ѝ е целосно објаснето на другата страна“, рече Аракчи.
Писмото на Трамп беше доставено до Иран од официјален претставник на Емиратите на 12 март. Некои набљудувачи тврдат дека одлуката на Иран да одговори преку Оман е резултат на загриженоста за односите меѓу Обединетите Арапски Емирати и Израел.
Други, пак, укажаа на односот на Трамп со израелскиот премиер Бенјамин Нетанјаху, велејќи дека Вашингтон ќе го информира Израел за содржината на иранското писмо.
Извештаите велат дека писмото на Трамп вклучувало предлог за директни преговори за иранската нуклеарна програма и закани дека неуспехот да се постигне договор ќе има тешки последици. Вашингтон не ја отфрли можноста за воздушни напади врз иранската нуклеарна програма.
Али Шамхани, врвен советник на иранскиот врховен лидер, ајатолахот Али Хамнеи, рече дека одговорот на Техеран е „воздржан“.
„Во писмото се вели дека Иран е подготвен за индиректни преговори и доколку разговорите се водат на рамноправна основа, постои подготвеност да се преземат понатамошни чекори за преговори“, изјави Шамхани, поранешен советник за национална безбедност.
Али Ваез, директор на иранската програма во Меѓународната кризна група, вели дека инсистирањето на Техеран на индиректни преговори нема да помине добро во Вашингтон.
„Трамп нема интерес за индиректни преговори“, изјави Ваез за Радио Фарда. „Секои индиректни преговори преку посредници, без разлика колку добро напредуваат, ќе бидат ранливи“.
Хосеин Мусавијан, поранешен ирански амбасадор во Германија, напиша на Икс дека верува оти Иран дал „двосмислен одговор“ и „се осврна на сите клучни точки во писмото на Трамп“.
Сепак, Ваез ги критикуваше преговарачките тактики на Иран, тврдејќи дека носителите на одлуки во Техеран „немаат разбирање“ за тоа како функционира Трамп.
„Не можете да бидете двосмислени со Трамп и неговите претставници. Овој вид дипломатија не функционира со оваа администрација“, рече тој, додавајќи дека Иран треба да даде јасен предлог за директни разговори.
„Иранскиот пристап е губење време, а во најлош случај ќе нè доведе до ќорсокак каде повеќе не можете да најдете мирно решение“, рече Ваез.
Исламската република инсистира на тоа дека нејзината нуклеарна програма е мирољубива, но има сè поголеми повици меѓу тврдокорните страни таа да се претвори во оружје.
Трамп ги повлече Соединетите Држави од нуклеарниот договор со Иран од 2015 година за време на својот прв мандат, тврдејќи дека не оди доволно далеку за да ја ограничи иранската закана, како што е ограничување на нејзината ракетна програма и прекинување на поддршката за нејзините регионални претставници.
Иран вели дека е подготвен да разговара за укинување на американските санкции, но категорично ја отфрли можноста за разговори за ракетната програма и регионалните активности.
