„Од клучно значење е да се постигне прекин на огнот во Газа“, рече Гутереш, истакнувајќи дека тоа е потребно „за да се избегнат смртни случаи и уништување што неизбежно би се предизвикале со воена операција против градот Газа“.
Генералниот секретар на ОН се наоѓа во Јапонија, каде што учествува на Меѓународната конференција за развој на Африка во Токио.
Израел, кој мобилизираше десетици илјади воени резервисти, продолжува со плановите за заземање на најголемиот урбан центар во Газа и покрај меѓународните критики за операцијата, за која се очекува насилно да расели уште повеќе Палестинци. Во моментов, Израел држи околу 75% од Појасот Газа.
Војната во Газа започна на 7 октомври 2023 година, кога вооружени напаѓачи предводени од Хамас започнаа напад врз јужните израелски заедници во кои, според израелските податоци, беа убиени околу 1.200 луѓе, претежно цивили, а 251 заложник, вклучувајќи деца, беа однесени во Газа.
Во израелската воена офанзива врз Појасот Газа досега се убиени најмалку 60.000 Палестинци, според Министерството за здравство на Газа.
Гутереш повика на безусловно ослободување на заложниците што ги држи Хамас. Тој, исто така, го повика Израел да ја поништи одлуката за проширување на „нелегалната“ изградба на населби на Западниот Брег.
Израелскиот план за изградба на населби, кој би го отсекол окупираниот Западен Брег и би го одвоил од Источен Ерусалим, беше објавен минатата недела и доби конечно одобрение во средата од комитетот на Министерството за одбрана за планирање.
Палестинското Министерство за надворешни работи соопшти дека изградбата ќе ги изолира палестинските заедници што живеат таму и ќе ја поткопа можноста за решение со две држави.
