„Јасно е дека Марин Лепен е мој кандидат, но ако утре ѝ биде забрането да се кандидира, мислам дека можам да ви кажам дека јас би бил нејзин кандидат“, рече Бардела во интервју за францускиот Ле Паризиен.
Бардела, 29-годишниот претседател на групата „Патриоти за Европа“ во Европскиот парламент, долго време се сметаше за наследник во Националниот собир, но досега не призна отворено дека е подготвен да се вклучи во претседателската трка доколку е потребно.
Тој се појави како најочигледен кандидат за најголемата крајно десничарска партија во Франција за изборите во 2027 година откако Лепен беше прогласена за виновна за проневера и веднаш беше казнета со петгодишна забрана за кандидирање за јавни функции.
Лепен и уште 23 други се обвинети за нелегално користење на повеќе од 4 милиони евра од средствата на Европскиот парламент за плаќање на соработници кои формално биле асистенти на пратеници, но всушност работеле за партијата.
„Работам и се подготвувам“, рече Бардела, нагласувајќи ја „апсолутната неопходност да останеме обединети“.
Тој исто така нагласи: „Марин Лепен ужива претпоставка на невиност и ќе ги искористиме сите законски можности да продолжиме да ја браниме нашата невиност во овој случај“. Апелациониот суд објави дека ќе донесе одлука за случајот до летото следната година.
