„Ова не е војна на НАТО. НАТО е одбранбен сојуз“, изјави портпаролот на владата Стефан Корнелиус пред новинарите во Берлин. „Германската влада мора јасно да ја процени ситуацијата на територијата на Алијансата и сопствената позиција за учество во оваа војна“, додаде тој.
Тој нагласи дека ескалацијата на конфликтот би ги загрозила регионалните партнери. „Проширувањето на борбените операции би носело големи ризици за другите партнери на Блискиот Исток и Заливот“, рече тој. Германската влада и претходно повеќе пати изјавуваше дека нема да учествува во американската војна против Иран.
Германскиот министер за надворешни работи Јохан Вадефул изрази претпазливост во врска со евентуалната мисија на НАТО во Ормускиот теснец, велејќи дека на европските сојузници прво им е потребна поголема јасност во врска со плановите на САД и Израел за Иран.
Пред состанокот на министрите за надворешни работи на ЕУ во Брисел, Вадефул им изјави на новинарите дека Германија ќе се фокусира на спречување на понатамошна ескалација и барање дипломатски решенија за кризата, објави Анадолу.
„Очекуваме САД и Израел да нè информираат и да нè вклучат во своите активности и да ни кажат дали ги постигнале своите цели. Само кога ќе имаме јасна слика за ова, веруваме дека можеме да преминеме на следната фаза, што е дефинирање на безбедносна архитектура за целиот регион, заедно со соседните земји“, рече Вадефул.
Тој нагласи дека создавањето таква рамка на крајот ќе бара и дијалог со Иран, но призна дека таквите разговори во моментов не се на дневен ред.
Запрашан за повикот на американскиот претседател Доналд Трамп до сојузниците од НАТО да помогнат во обезбедувањето на Ормускиот теснец, Вадефул го повтори ставот на Берлин дека Германија нема намера да се приклучи на воените операции во конфликтот.
„Искрено, ситуацијата воопшто не се променила од синоќа“, рече министерот. „Не гледам дека НАТО донел каква било одлука во таа насока или дека би можел да преземе одговорност за Ормускиот теснец. Ако беше така, телата на НАТО би се справиле со тоа на соодветен начин.“
