Во меморандум од 2025 година, обвинителите напишаа дека видеата и фотографиите запленети од домовите на Епстин во Њујорк, Флорида и Девствените Острови не ја покажуваат злоупотребата на жртвите ниту сугерираат дека други биле вклучени во неговите злосторства.
Друг интерен меморандум од 2019 година вели дека прегледот на финансиските трансакции на Епстин, вклучително и уплатите на субјекти поврзани со влијателни личности во академската заедница, финансиите и меѓународната дипломатија, не покажал никаква врска со криминална активност.
Во документите, исто така, се наведува дека една од жртвите на Епстин јавно тврдела дека тој ја „позајмувал“ на богати пријатели, но агентите не можеле да го потврдат тоа и не пронашле други жртви кои би раскажале слична приказна.
Е-поштата во која се сумира истрагата минатиот јули вели дека „четири или пет“ од обвинителките на Епстин тврделе дека биле сексуално злоупотребени од други мажи или жени. Но, агентите заклучиле дека „немало доволно докази“ за федерални обвиненија и ги упатиле случаите до локалните власти.
АП и други новински организации сè уште прегледуваат милиони страници документи, од кои многу претходно биле класифицирани, што Министерството за правда ги објави во согласност Законот за транспарентност на досиејата на Епстин.
Можно е во тој материјал да има докази што истражителите не ги забележале, но објавените досиеја досега даваат најјасна слика зошто американската држава на крајот го затвори случајот без дополнителни обвиненија.
Истрагата започнала во 2005 година, откако родителите на 14-годишно девојче пријавиле дека Епстин ја злоупотребил во неговиот дом во Палм Бич, Флорида. Полицијата подоцна идентификуваше најмалку 35 девојки со слични изјави. Епстин наводно на средношколките им плаќал 200 или 300 долари за сексуализирани „масажи“.
Откако ФБИ се вклучи, федералните обвинители подготвија обвиненија против Епстин и некои асистенти кои ги организирале пристигнувањата и плаќањата на девојките. Наместо тоа, тогашниот американски обвинител од Мајами, Александар Акоста, склучил договор во кој Епстин се изјаснил за виновен по државните обвиненија за наведување малолетнички во проституција. Тој беше осуден на 18 месеци затвор и ослободен во средината на 2009 година.
Во 2018 година, серија текстови во „Мајами Хералд“ за договорот ги поттикнаа федералните обвинители во Њујорк повторно да го отворат случајот. Епстин беше уапсен во јули 2019 година, а еден месец подоцна изврши самоубиство во својата затворска ќелија.
Една година подоцна, обвинителите ја обвинија Гислен Максвел, долгогодишна блиска соработничка на Епстин, тврдејќи дека таа регрутирала некои од жртвите, а понекогаш учествувала во злоупотребата. Максвел беше осудена во 2021 година и отслужува 20-годишна затворска казна.
Документите покажуваат дека агентите и обвинителите истражувале можни помагачи, проверувале дојави, дури и оние што звучеле бизарно. Истражителите разговарале во 2011 година и повторно во 2019 година со Вирџинија Робертс Џуфре, која во тужби и интервјуа тврдела дека Епстин ѝ организирал сексуални средби со бројни мажи, вклучувајќи го и Ендру Маунтбатен-Виндзор, порано познат како принцот Ендру.
Според истражителите, потврдено е дека Џуфре била жртва на Епстин, но други делови од нејзината приказна се сметале за проблематични. Две од другите жртви на Епстин, за кои Џуфре тврдела дека биле исто така „позајмувани“ на моќни мажи, им рекле на истражителите дека немале такво искуство, според интерна белешка од 2019 година.
Во истиот меморандум се наведува: „Ниту една друга жртва не опиша дека била конкретно упатена од Максвел или Епстин да има сексуални односи со други мажи“. Обвинителите се обиделе да закажат интервју со Ендру Маунтбатен-Виндзор, но тој не се ставил на располагање.
Во февруари 2025 година, американската обвинителка Пам Бонди изјави за Фокс њуз дека никогаш претходно видениот „список на клиенти“ на Епстин е „на нејзината маса“. Неколку месеци подоцна, таа тврдеше дека ФБИ разгледува „десетици илјади видеа“ од Епстин „со деца или детска порнографија“.
Но, е-поштата на ФБИ покажува спротивно. На 30 декември 2024 година, околу три недели пред претседателот Џо Бајден да ја напушти функцијата, тогашниот заменик-директор на ФБИ Пол Абате побарал да се потврди дали постои „список на клиенти“ за кој се зборува во медиумите.
Следниот ден, службено лице на ФБИ одговори дека агентот за случајот потврдил дека не постои таков список. И на 19 февруари 2025 година, два дена пред појавувањето на Бонди на „Фокс њуз“, супервизор на ФБИ напиша: „Иако медиумите спомнуваат „список на клиенти“ во случајот Џефри Епстин, истражителите не пронајдоа таков список за време на нивната истрага“.
Истражителите запленија голем број фотографии и видеа од уредите и домовите на Епстин. Тие пронајдоа ЦД-а, фотографии и барем една видеокасета со снимки од голи жени, од кои некои изгледале како малолетни.
Еден уред содржел 15 до 20 слики што прикажуваат комерцијална содржина за сексуална злоупотреба на деца, за која истражителите велат дека Епстин ја преземал од Интернет.
Но, според е-пошта испратена минатата година од тогашната помошничка на американскиот обвинител Морен Коми, не се пронајдени видеа на кои се злоупотребувани жртвите на Епстин, ниту пак видеа на кои покрај голи жени се гледаат и мажи, и нема материјал што би инкриминирал никого освен Епстин и Максвел.
„Доколку постоеја такви видеа, државата ќе ги следеше сите траги што можеа да произлезат од нив“, напиша таа, додавајќи: „Сепак, не пронајдовме ниедно такво видео.“
Во документите се наведува дека обвинителите размислувале да покренат обвинение против една од долгогодишните асистентки на Епстин во 2019 година, но го отфрлиле случајот. Тие заклучиле дека таа била вклучена во плаќањата на девојките и можеби знаела дека некои се малолетни, но истовремено ја сметале и за жртва на манипулацијата и злоупотребата на Епстин.
Истражителите, исто така, ја истражувале врската на Епстин со францускиот агент за модели Жан-Лик Брунел, кој е обвинет во Европа за сексуално злоставување жени. Брунел извршил самоубиство во затвор во Франција додека чекал судење.
Исто така, се разгледувало и гонење на една од девојките на Епстин, која учествувала во сексуални дејствија со некои од жртвите, но во резимето на директорот на ФБИ, Каш Пател, од минатиот јули се вели дека „нема доволно докази“. „Постојат малку докази за нејзината вмешаност“, напишал агент на ФБИ за Векснер во е-пошта од 16 август 2019 година.
