„Ова е голем момент за жените од Фарските Острови, кои сега можат да се чувствуваат почитувани во сопствената земја. Тие конечно имаат право сами да одлучуваат за своите тела“, изјави за данската јавна телевизија (ДР) Хервор Палсдотир, пратеник од левичарската Републиканска партија во парламентот, во кој доминираат три партии од социјалдемократскиот блок.
Според претходниот закон, кој исто така беше на сила во Данска до почетокот на 1970-тите, абортусот на Фарските Острови беше дозволен само во исклучителни случаи: ако животот на жената е во опасност, во случаи на силување или инцест, ако фетусот страда од сериозна и неизлечива болест и ако жената се смета за неспособна да се грижи за детето.
Досега, за абортусот одлучуваа исклучиво лекарите, но под закана од двегодишна затворска казна ако дозволат абортус наспроти законските критериуми. Бремената жена која абортирала можеше да биде осудена и на затвор до три месеци ако била свесна дека не се исполнети законските услови. Поради кривична одговорност, жените од Фарските Острови често патувале во Данска за абортус, по цена од најмалку 2.000 евра.
„Жените беа свесни дека мораат да поминат низ законска постапка пред да може да разговараме за што им е потребно. Беше многу непријатно и ја нарушуваше довербата меѓу лекарите и пациентите. Повеќето жени од Фарските Острови знаеја кои се исклучоците за абортус. Значи, тие знаеја што и како да кажат за да добијат абортус“, изјави гинекологот Дијана Рејнстинд за ДР.
Најновите официјални податоци од 2023 година покажуваат дека на Фарските Острови се извршени 42 абортуси и породување на 573 живородени деца. Стапката на абортуси е многу пати помала отколку во Данска, но статистиката не ги вклучува жените од Фарските Острови кои извршиле абортус во Данска.
Иницијативата за легализација на абортусот по барање доби на интензитет пред неколку години, кога Фарското медицинско здружение спроведе анкета меѓу своите членови за промена на законот за абортус. Околу 80 проценти од лекарите ја поддржаа промената, но беше потребно време за да се промени и политичката клима.
За законодавниот предлог што беше усвоен минатата недела се гласаше и минатата година, но тогаш не помина. Фарските Острови секако се под влијание на ставот на Данска, која во јуни оваа година дозволи абортус по барање до 18-та недела од бременоста (претходно беше дозволен до 12-та недела) и ја укина обврската за родителска согласност за абортуси на малолетници над 15 години.
Ерхард Јоенсен, претставник на конзервативната Унионистичка партија на Фарските Острови, гласаше против предлогот за легализација на абортусот по барање и смета дека ова прашање не е дефинитивно решено: „Го почитувам исходот од гласањето, но ми се чини дека новиот закон не ужива голема поддршка. Прашањето е што ќе се случи по парламентарните избори следната година. Мислам дека многумина не ја поддржуваат оваа промена“.
Фарските Острови се придружија на трендот на либерализација на абортусот во Европа, односно ја напуштија сè помалата група земји со рестриктивни закони. Андора останува единствената европска земја со целосна забрана за абортус, без никакви законски исклучоци. Абортусот по барање во моментов не е дозволен ниту во Малта, Полска, Монако и Лихтенштајн.
Треба да се додаде и дека Фарските Острови (со население од околу 55.000) имаат една од највисоките стапки на фертилитет во Европа (1,9). Просечната стапка на фертилитет во Европа е околу 1,4. За да може секоја генерација од населението да биде заменета со следната генерација, без потреба од имиграција, потребна е стапка од 2,1. Сè што е под тоа значи намалување на домашното население.
