Претседателката на Европската комисија Урсула фон дер Лаен го поздрави брзото усвојување на предлогот од страна на парламентот, нагласувајќи ја континуираната посветеност на ЕУ кон Украина.
„Храброста на Украина е непоколеблива. Како и решеноста на Европа да застане зад неа. Денес и утре! Бидејќи силна Украина ја прави цела Европа побезбедна“, напиша таа на социјалната мрежа Икс.
Според предложената рамка, финансирањето ќе ѝ биде достапно на Украина преку два главни канали.
Од вкупниот износ, 30 милијарди евра ќе бидат обезбедени како макроекономска поддршка, или преку макрофинансиска помош или преку Инструментот за Украина, наменски инструмент на ЕУ дизајниран да обезбеди стабилна и предвидлива финансиска поддршка на Киев.
Останатите 60 милијарди евра ќе бидат искористени за зајакнување на капацитетот на одбранбената индустрија на Украина и поддршка на набавката на воена опрема, давајќи ѝ на Украина навремен пристап до одбранбени производи од домашните и од индустриите на ЕУ.
Претседателката на Европскиот парламент, Роберта Мецола, изјави дека гласањето обезбедило витален спас за Украина, нагласувајќи дека финансирањето ќе обезбеди континуитет на основните јавни услуги, а воедно ќе ја зајакне одбраната на земјата.
Пакетот сè уште треба формално да биде одобрен од Советот на ЕУ пред Комисијата да може да ја исплати првата транша од средствата, што се очекува на почетокот на вториот квартал од 2026 година.
Во декември, лидерите на ЕУ се согласија, по неколкунеделни преговори, да ја финансираат Украина со задолжување на пазарите на капитал во 2026 и 2027 година. Одлуката дојде откако земјите-членки не успеаја да постигнат консензус за директно користење на замрзнатите руски средства за поддршка на Украина.
