Предлог-законот треба да биде објавен на 15 април, три дена по изборите во Унгарија. Тој датум, според два извори цитирани од Ројтерс, е избран за да се избегне забраната за увоз на руска нафта да стане големо прашање во изборната кампања.
Европската Унија уште во 2022 година забрани увоз на руска нафта која се превезува по морски пат.
Исклучоци беа дадени за земјите без излез на море (Чешка, Унгарија и Словачка), на кои им е дозволено да увезуваат руска нафта по море во случај испораката преку цевковод да не е можна.
Испораките на нафта преку нафтоводот Дружба беа прекинати на 27 јануари во руски напад со беспилотни летала. Унгарија ја обвинува Украина за одложување на поправката на нафтоводот и затоа го блокира 20-от пакет санкции против Русија и заем за Украина од 90 милијарди евра. Словачка се приклучи кон Будимпешта.
Со новиот закон, Комисијата сака трајно да го забрани увозот на руска нафта. Според податоците за последниот квартал од минатата година, ЕУ увезувала само 1 процент од руската нафта, меѓутоа, Унгарија и Словачка не направиле ништо за да се ослободат од зависноста од руските енергетски производи и сега се речиси целосно зависни.
Минатиот месец, Европската Унија донесе закон кој предвидува целосно прекинување на увозот на руски гас од есента 2027 година. Унгарија и Словачка најавија дека ќе се борат против тоа пред Судот на ЕУ.
