Островот Харг, кој се наоѓа во Персискиот Залив, е главен ирански центар за извоз на нафта, при што 90 проценти од сировата нафта оди во Кина. Окупацијата на островот се дискутираше во рамки на американската администрација во последните денови за да се принуди Иран да ја прекине блокадата на Ормускиот теснец.
Американски функционер потврди за Џерусалим пост дека „американската војска го забрзала распоредувањето на илјадници маринци и персонал на морнарицата на Блискиот Исток“.
Распоредувањето ја вклучува амфибиската воена групација УСС Боксер – која ја сочинуваат амфибискиот јуришен брод УСС Боксер – кој функционира како лесен носач на авиони – и амфибиските транспортни бродови УСС Портланд и УСС Комсток. Овие три брода носат приближно 4.500 маринци и дополнителен борбен персонал.
Пред околу недела и пол, САД нападнаа воени цели на островот Харг, по што американскиот претседател Доналд Трамп објави на Твитер: „Ги уништивме сите воени цели на островот“. Претседателот додаде дека тогаш одлучил да не ја уништи целата нафтена инфраструктура на островот, но предупреди: „Доколку Иран го попречува движењето низ Ормускиот теснец, ќе ја преиспитам одлуката“.
Завчера, Трамп му се закани на Иран, велејќи дека доколку блокадата на теснецот не се укине, тој ќе ги нападне иранските електрани.
Со оглед на пркосниот одговор на Иран на предупредувањата на претседателот, се смета за малку веројатно дека доброволно ќе ја прекине поморската блокада. Затоа, моменталната работна претпоставка е дека ќе биде потребна воена операција за да се обезбеди слобода на пловидба низ теснецот.
