Полицијата уапси седум лица во Москва и Санкт Петербург, шест лица во сибирскиот град Новосибирск и уште шестмина во градот Челјабинск на Урал, според независната веб-страница за следење на полицијата ОВД-инфо.
Во Санкт Петербург властите ги приведоа новинарите на независниот весник „Новаја газета“ Јелена Лукјанова и Андреј Душутин, бидејќи со возило ја донеле Јелена Осипова, преживеана од блокадата на Ленинград и ветеран демонстрант, на антивоена инсталација.
Лукјанова беше обвинета за прекршување на мерките против коронавирусот. Двајцата беа ослободени по повеќе од три часа во полициската станица, објави европското издание на Новаја газета на социјалните мрежи.
Друга приведена активистка во Санкт Петербург приреди перформанс врзувајќи се со лисици на оградата пред телевизор со ликот на про-Кремљ експертот Владимир Соловјов.
Најмалку двајца демонстранти во Москва и во административниот центар на Република Удмуртија, Ижевск, биле приведени додека држеле плакат со традиционалната првомајска парола „Мир, труд, мај“.
Повеќе од 15.000 антивоени демонстранти се приведени низ цела Русија откако претседателот Владимир Путин нареди инвазија на Украина на 24 февруари.
Најмалку 100 лица се обвинети за кривични дела, од кои 32 за наводно ширење „лажни вести“ за акциите на руската војска во странство и 26 за вандализам.
