Новата политика на Пентагон бара од новинарите да ги прифатат новите правила за пристап на медиумите, вклучително и тоа дека би можеле да бидат означени како безбедносен ризик и да им бидат одземени нивните новинарски акредитации за Пентагон доколку од вработените во одделот побараат да им откријат класифицирани и одредени видови некласифицирани информации.
Редакциите велат дека новата политика ја загрозува слободата на печатот и дека новинарите би можеле да бидат казнети за вршење работа заштитена со Првиот амандман на американскиот Устав.
Ројтерс е меѓу оние кои одбија да ги прифатат правилата, при што како образложение ги наведоа заканите за слободата на печатот.
Други кои го објавија своето одбивање да ги прифатат новите правила за пристап на медиумите во изјави или во своите вести се: Асошиејтед Прес, Блумберг Њуз, Њујорк Тајмс, Волстрит џурнал, Вашингтон пост, Си-ен-ен, Фокс њуз, Си-би-ес, Ен-би-си, Еј-би-си, Ен-пи-ар, Аксиос, Политико, Гардијан, Атлантик, Хил, Њузмакс, Брејкинг дефенс и Таск енд пурпс.
„Ројтерс е посветен на точно, непристрасно и независно известување“, соопшти агенцијата.
„Исто така, цврсто веруваме во заштитата на печатот гарантирана со Уставот на САД, во слободниот проток на информации и во новинарството што служи на јавниот интерес без страв или фаворизирање. Новите ограничувања на Пентагон ги кршат овие основни вредности“, додаде Ројтерс.
Главниот портпарол на Пентагон Шон Парнел во понеделник изјави дека „новите правила не бараат од нив да се согласат, туку само да признаат дека разбираат каква е нашата политика“.
„Затоа новинарите доживеаа целосен колапс, глумејќи жртва на интернет. Ние стоиме зад нашите политики затоа што тоа е најдобро за нашите трупи и националната безбедност на оваа земја“, рече Парнел.
Пентагон им даде рок на медиумите до вторник да ги прифатат новите правила или да ги вратат своите акредитации и да ги напуштат своите канцеларии во зградата на Пентагон до среда.
Според новите правила, на новинарите им е забрането слободно да се движат низ поголемиот дел од Пентагон без официјална придружба. Покрај тоа, министерот за одбрана Хегсет има овластување да му го одземе пристапот на секој што се обидува да добие какви било информации, класифицирани или не, што не се одобрени за објавување.
Хегсет, кој претходно работеше за Фокс њуз, рече дека барањата претставуваат „здрав разум“, додавајќи дека „се обидуваме да се осигуриме дека националната безбедност се почитува“.
Тој објави на Икс дека новинарите повеќе не можат слободно да шетаат низ Пентагон, дека мора да носат видливи новинарски пропусници, дека акредитираните медиуми повеќе не им е дозволено да повикуваат на криминални активности и дека Пентагон сега има исти правила како и која било друга американска воена база.
Запрашан во вторникот што мисли за новата политика на Пентагон за пристапот на медиумите, претседателот Доналд Трамп рече дека шефот на Пентагон Пит Хегсет „верува дека печатот е голема закана за светскиот мир и можеби за безбедноста на нашата нација“.
Во ревидираната политика се наведува дека примањето или откривањето чувствителни информации „генерално е заштитено со Првиот амандман“, но предупредува дека барањето за откривање на такви информации „може да влијае на тоа дали претставувате безбедносен ризик“.
„Правата на печатот не се апсолутни и не го надминуваат убедливиот интерес на владата за одржување на доверливоста на чувствителните информации“, соопшти Пентагон.
Петте главни телевизиски мрежи издадоа заедничка изјава во вторникот во која се вели: „Денес им се придружуваме на речиси сите други новински организации во одбивањето да се согласиме со новите барања од Пентагон, кои би ја ограничиле можноста на новинарите да ја информираат нацијата и светот за важни прашања од националната безбедност. Политиката е без преседан и ја загрозува основната заштита на новинарите. Ќе продолжиме да известуваме за американската војска како што секоја од нашите организации го правеше тоа со децении, почитувајќи ги принципите на слободен и независен печат.“
Дописникот на Њујорк тајмс од Вашингтон, Ричард Стивенсон, изјави: „Откако политиката беше првично објавена, изразивме загриженост дека таа го ограничува начинот на кој новинарите можат да известуваат за американската војска, која се финансира од речиси трилион долари пари од даночните обврзници годишно. Јавноста има право да знае како функционираат владата и војската.“
Едно од барањата е новинарите да признаат дека откривањето чувствителни информации може да ѝ наштети на националната безбедност на САД. Адвокатите тврдат дека според Законот за шпионажа, тоа би можело да им помогне на обвинителите ако се обидат да обвинат новинар за протекување информации поврзани со војската.
Конзервативна кабелска новинска мрежа Уан Америка њуз (ОАН), која силно го поддржува Трамп, потпиша согласност за новите правила.
„По темелен преглед на ревидираната политика за печатот од страна на нашиот адвокат, персоналот на ОАН го потпиша документот“, изјави Чарлс Херинг, претседател на матичната компанија на ОАН, Херинг Нетворкс. Ројтерс не можеше веднаш да утврди дали други организации го потпишале.
