Министерството за внатрешни работи соопшти дека Борисов е приведен на 24 часа заедно со поранешниот министер за финансии Владислав Горанов и својата советничка за медиуми Севдалина Арнаудова.
Властите не соопштија детали за евентуалните обвиненија на нивна сметка, но бугарските медиуми известија дека случаите истражуваат злоупотреба на фондовите на ЕУ.
Премиерот Кирил Петков кажа дека истрагите на Европското јавно обвинителство се во тек и дека ќе се види реакцијата на бугарското обвинителство.
„Ќе видиме каде е бугарското обвинителство и дали конечно ќе застане на страната на бугарскиот народ. Овие настани покажуваат дека во Бугарија никој не е над законот“, кажа Петков.
Актуелниот министер за финансии Асен Василев кажа денес дека финансиски инспектори на основа на дојава собрале докази дека наводно 556 милиони лева (280 милиони евра) не влегле во државниот буџет под надзор на Борисов и неговиот министер за финансии.
Борисов е еден од основачите на, сега опозициската, партија од десниот центар ГЕРБ чии пратеници ја напуштија седницата и им се придружија на демонстрантите пред бугарскиот парламент барајќи негово ослободување.
Апсењата следеа по објавата на главната европска обвинителка Лаура Ковеси дека се отворени 120 истраги за проневера на пари на ЕУ во Бугарија од јавни тендери, земјоделски субвенции и фондовите за опоравување од коронавирусот.
