Предлог-законите беа усвоени од Претставничкиот дом со 96 гласа „за“ и 45 „против“ и сега се испратени до Сенатот.
„Нападот на плажата Бондај, во кој загинаа 15 лица, беше дело на поединци со омраза во срцата и оружје во рацете“, рече министерот за внатрешни работи Тони Бурк при претставувањето на законите.
„Оваа трагедија бара сеопфатен одговор од владата. Мора да направиме сè што можеме да се спротиставиме и на мотивацијата и на методот“, нагласи министерот.
Новите мерки вклучуваат воспоставување национална програма за откуп за намалување на бројот на оружје кај населението. Покрај тоа, постојат планови за воведување построги проверки пред државите да издаваат дозволи за оружје, користејќи информации што ги поседува Австралиската безбедносно-разузнавачка агенција.
Според владини бројки, минатата година во Австралија имало 4,1 милион парчиња огнено оружје, од кои 1,1 милион во Нов Јужен Велс, најнаселената држава и каде се случи пукањето за време на Ханука.
Дополнително, Нов Јужен Велс донесе свој сет закони со кои се ограничува бројот на парчиња огнено оружје по лице на четири. Исклучок се земјоделците, кај кои ограничувањето е поставено на десет. Понатаму, сопствениците на огнено оружје ќе мора да ги обноват своите лиценци по две години, наместо сегашните пет.
„Бројот на огнено оружје што моментално циркулира во австралиската заедница е неодржлив“, рече Бурк.
Предлог-законот не беше поддржан од пратениците на конзервативната опозиција, кои ја обвинија лабуристичката влада на премиерот Антони Албаниз дека не успеала соодветно да се справи со растечкиот антисемитизам.
Парламентот, на барање на премиерот, го одложи летниот одмор за расправите околу овие закони. Исто така, на дневен ред е предлог што би го намалил прагот за гонење на говорот на омраза.
