Конечната верзија на законот беше изгласана од 60 сенатори, а 40 беа против.
Процесот сè уште не е завршен, но се очекува дека нема повеќе пречки за повторно отворање на владата. Законот сè уште треба да биде поддржан од Претставничкиот дом, кој се очекува да одлучи за него во среда. По усвојувањето на таа инстанца, законот ќе биде испратен во Белата куќа на потпис од страна на американскиот претседател Доналд Трамп.
Сенаторите започнаа со работа во 11 часот по локално време, а гласаа за клучниот закон за прекинување на блокадата на владата кратко по 21 часот.
Во времето на објавувањето на усвојувањето на законот, повеќето сенатори веќе ја напуштија просторијата. Но, оние што останаа ја поздравија одлуката, која треба да им донесе олеснување на околу 1,4 милиони вработени кои се на неплатен годишен одмор повеќе од еден месец или работат без да добијат плата, како и за милиони други Американци. Тоа треба да биде и крај на хаосот на американските аеродроми, каде што беа откажани 2.000 летови, а повеќе од 7.000 беа одложени поради недостаток на контролори на лет.
„Ќе ја отвориме владата повторно, ќе се погрижиме федералните вработени да го примат надоместот што го заработиле и го заслужуваат“, рече републиканската сенаторка Сузан Колинс, која одигра клучна улога во изготвувањето на законот.
Меѓу демократските сенатори, имаше многумина разочарани и загрижени за идните потези на партијата. Повеќето од нив сакаа да истраат во блокадата и да чекаат републиканците да попуштат во мерките за здравството. По овој компромис, поддржан од осум опозициски сенатори, оправдано се поставува прашањето како демократите ќе им се спротивстават на републиканците и претседателот Трамп во иднина.
