Распоредувањето на бродовите, кои можат да се користат за надзор или самоубиствени напади, досега не е јавно објавено и доаѓа и покрај низата неуспеси во долгогодишните напори на американската морнарица за изградба на флота од беспилотни површински бродови, објави Ројтерс.
Важноста на поморските дронови порасна во последниве години, откако Украина користеше глисери полни со експлозив за да нанесе значителна штета на руската Црноморска флота. Иран, исто така, користеше поморски дронови во најмалку два напади врз танкери за нафта во Заливот откако САД и Израел ги започнаа своите напади пред речиси еден месец.
Досега, нема индикации дека Соединетите Американски Држави ги користеле поморските дронови за офанзивни напади. Како одговор на прашањето на Ројтерс, портпаролот на Централната команда на Пентагон, Тим Хокинс, изјави дека патролите користеле беспилотни бродови од компанијата „Блек си“ со седиште во Мериленд, познати како „Глобални автономни извиднички бродови“ или „ГАРЦ“, како дел од американската кампања против Иран, наречена операција „Епски бес“.
„Американските сили продолжуваат со употребата на беспилотни системи на Блискиот Исток, вклучувајќи површински поморски дронови како ГАРЦ“.
Поточно, оваа платформа успешно има евидентирано повеќе од 450 часа време на пловење и поминала над 2.200 наутички милји за време на поморските патроли како дел од операцијата „Епски бес“, рече Хокинс во соопштението. Хокинс одби да ги именува другите беспилотни системи што се користат, а „Блек си“ одби да коментира за случајот.
САД со години се обидуваат да изградат флота од автономни беспилотни површински и подводни бродови како поевтина и побрза алтернатива на бродовите и подморниците со екипаж, особено во контекст на спротивставување на растечката поморска моќ на Кина во Пацификот. Сепак, тие напори се соочуваат со одложувања, технички тешкотии, загриженост за трошоците и серија неуспешни тестови.
Ројтерс минатата година објави дека ГАРЦ, аголен глисер долг околу пет метри, имал повеќекратни проблеми со перформансите и безбедноста, вклучително и судир со друг брод со голема брзина за време на воено тестирање.
Според извор запознаен со ситуацијата, за време на уште еден неуспешен тест на Блискиот Исток во последните недели, еден глисер на ГАРЦ станал нефункционален.
Хокинс не сакаше да коментира за неуспесите при тестирањето. „ГАРЦ е способност во развој и е дел од флота од површински дронови управувани од Петтата флота на САД за подобрување на увидот во состојбата во регионалните води“, рече тој.
