Со новите предлози за измена на нацрт-законот се дефинира дека полот ги означува улогите и однесувањата што општеството ги смета за соодветни за жените и мажите.
Законот предизвика расправа за време и надвор од седницата, додека пратениците од опозициската Демократска партија (ДП) му се спротивставија бидејќи, според нивните зборови, „неговата цел е уништување на семејството“.
Албанскиот премиер Еди Рама, реагирајќи на социјалните мрежи, го опиша како многу благороден закон, целосно во согласност со принципите на Европската унија за родова еднаквост и недискриминација.
Поранешниот премиер и лидер на ДП Сали Бериша обраќајќи се до амбасадорот на Европската унија (ЕУ) во Албанија, Силвио Гонзато, рече дека го замолува да објасни која директива на ЕУ бара такво нешто.
Според албанските власти, Законот за родова еднаквост има за цел да ги регулира фундаменталните прашања за родовата еднаквост во сите области на јавниот и приватниот живот со цел целосно и ефикасно, законски и во пракса, да се постигне еднаквост.
Исто така, се нагласува дека има за цел еднаков третман, без оглед на полот, преку заштита, еднакви можности во остварувањето на правата и користењето на добра и услуги, учество, застапување и помош во развојот на сите области на општествениот живот.
Предлог-законот предизвика реакции во Албанија бидејќи во првичната верзија, родот се дефинираше како инклузивен, член на кој се спротивставија опозициските политички партии и организациите на граѓанското општество.
Со новите предложени амандмани се дефинира дека родот означува улоги конструирани во општествен контекст, однесувања, активности и атрибути што даденото општество ги смета за соодветни за жените и мажите.
Во врска со предметниот закон, синоќа се одржа и протест на претставници на бројни организации и активисти.
Според организаторите на протестот, предлог-законот за родова еднаквост е антинационален, антибрачен и антидетски закон, и е против албанската традиција и култура. Тие исто така тврдат дека предлог-законот остава простор за злоупотреба на родовите концепти и дека не е применлив во пракса.
Во исто време, на синоќешната седница, парламентот гласаше и против формирањето парламентарна истражна комисија за разрешување на претседателот на Албанија, Бајрам Бегај.
Кон средината на октомври, Демократската партија (ДП) поднесе барање до Албанскиот парламент за започнување парламентарна постапка за разрешување на претседателот Бајрам Бегај.
Според ДП, барањето е поднесено поради сериозни и континуирани прекршувања на Уставот на Албанија од страна на Бегај.
Меѓу споменатите прекршувања се распишувањето избори во Тирана, назначувањето на виртуелната министерка Диела, престанокот на мандатот на уставниот судија и други прекршувања.
Бајрам Бегај официјално ја презеде должноста претседател на Албанија на 24 јули 2022 година.
