Вкупно 27 танкери со просек од 844.000 барели нафта и нафтени деривати дневно и 233.000 тони нуспроизводи и петрохемикалии испловиле од територијалните води на Венецуела во јуни, покажуваат податоците. Ова значи дека венецуелскиот извоз на нафта и деривати се зголемил за осум отсто во споредба со мај.
Во мај, Венецуела извезувала просечно 779 илјади барели нафта дневно и 329 илјади тони нуспроизводи и петрохемикалии. На крајот на мај, Вашингтон укина низа лиценци кои им дозволуваа на партнерите на венецуелската државна нафтена компанија ПДВСА, вклучувајќи ги американската Шеврон и шпанската Репсол, да испорачуваат нафта и гориво до американските и европските рафинерии.
ПДВСА оттогаш значително го зголеми извозот во Азија, продавајќи нафта и гориво преку малку познати посреднички компании кои управуваат со независни рафинерии во Кина. Пратките наменети за Азија вклучуваат „тешка“ нафта од Боскан што Шеврон некогаш ја испорачуваше во Соединетите Американски Држави, покажуваат интерните документи на венецуелската државна компанија.
Повисокиот јунски извоз првенствено го одразува скокот на испораките на нафта од марката Боскан во Азија, која се користи за производство на асфалт. Токму благодарение на овие испораки, ПДВСА успева да го одржи производството на полето Боскан, кое е едно од најголемите во Венецуела.
Кога ќе се вклучат директните испораки и испораките преку посредници, извозот во Кина сочинува, според податоците и документите, околу 90 отсто од јунските испораки. Во мај, нивниот удел бил 75 отсто. ПДВСА, исто така, испорачала околу 8.000 барели нафта и деривати дневно во Куба, а исто така испорачаа неколку пратки метанол и нафтен кокс во Европа и Индија, покажаа податоците.
