Во извештајот што се однесува на 2024 година се наведува дека властите во Република Српска, со мнозинско српско население, преземале континуирани чекори што значително ги загрозиле националните институции, ги зголемиле меѓуетничките тензии и ја ограничиле слободата на изразување.
„Ескалирачките вербални и правни напади на претседателот на Република Српска, Милорад Додик, го поткопале уставниот поредок на земјата, а раздорната и провокативна реторика на лидерот на Република Српска придонесе за зголемување на политичките и етничките тензии низ целата земја“, се тврди во извештајот објавен на 12 август.
Годишните извештаи за состојбата на човековите права, објавени од САД, го опфаќаат статусот на меѓународно признатите човекови права и правата на работниците во речиси 200 земји низ целиот свет.
Според проценката на министерството за надворешни работи на САД, значајните проблеми со човековите права во БиХ вклучуваат сериозни ограничувања на слободата на изразување и слободата на медиумите, вклучувајќи насилство и закани за насилство врз новинарите, како и значително присуство на најлошите форми на детски труд.
Во извештајот, во делот што се однесува на Босна и Херцеговина, се наведува дека Владата не презела убедливи чекори за идентификување и казнување на службениците кои извршиле злоупотреби на човековите права, објавува Н1.
Милорад Додик, претседателот на Република Српска, на кого му беше одземен тој мандат врз основа на пресудата со која му беше забрането да извршува политички функции шест години поради неспроведување на одлуките на високиот претставник, на социјалната мрежа Икс на 12 август го пофали интервјуто што американскиот лобист Род Благојевиќ го даде за американската телевизија Њузмакс.
Во него, Благојевиќ изјави дека е потребно да се преиспитаат одлуките на поранешниот американски претседател Џозеф Бајден. Тој изјави дека меѓу нив е и одлуката за американските санкции против Додик.
Договорот меѓу фирмата на Благојевиќ и Владата на Република Српска е потпишан во март 2025 година, а во него е наведено дека тој ќе лобира во САД за неоткриена хонорар.
Ова е само еден од низата договори за лобирање потпишани од властите на Република Српска со американски фирми во обид да го подобрат својот имиџ кај новата администрација во САД.
