За изгласување недоверба се потребни две третини од гласовите на претставниците, што ниту овој пат не беше постигнато. 165 претставници гласаа за отповикување на сегашното свикување на Комисијата, 390 беа против, а 10 се воздржаа.
Сега, како и во октомври минатата година, главната причина за покренување иницијативи за импичмент на Фон дер Лаен беше трговскиот договор на ЕУ со земјите од Меркосур, односно Јужна Америка.
Пратениците од Европскиот парламент Кинга Гал и Жан-Пол Гаро од клубот „Патриоти за Европа“, иницијаторите на овој предлог, сметаат дека трговскиот договор на ЕУ со Меркосур е „последната капка“ и „смртна пресуда за европските земјоделци по повеќе од 25 години преговори, што само укажува на широкиот отпор кон овој договор“, а на дебатата ги поддржаа претставниците на Европа на суверени нации и Европски конзервативци и реформисти.
Ова беше четврти обид за отповикување на Комисијата од јули минатата година, првиот го иницираше романскиот европратеник Георге Пипереа, а во октомври се гласаше за одделните иницијативи на Патриоти за Европа и Левица во Европскиот парламент.
Холандскиот член на Европскиот парламент Јероен Ленаерс ги прозва радикалните опции во Парламентот дека „премногу често се обидуваат да ги блокираат заедничките европски решенија, да обезбедат проблемите да останат нерешени, а потоа да ги користат овие проблеми како оружје за политичка добивка“ и го бранеше договорот потпишан минатата недела со Бразил, Аргентина, Парагвај и Уругвај.
„Европа мора да ги диверзифицира своите трговски партнери. И тоа е она што го прави оваа Комисија – спасува европски работни места. И токму тоа се обидуваат да го саботираат авторите на овој предлог. Тие се спротивставуваат на трговските договори како Меркосур, а потоа се жалат на губењето на работни места во Европа. Тоа е лицемерие“, оцени Ленаерс.
Белгиската европратеничка Кетлин Ван Бремпт и потпретседателка на Меѓународниот трговски комитет (ИНТА), оцени дека е „незамисливо“ тоа што крајната десница се обидува да ја собори Комисијата во оваа сериозна геополитичка ситуација.
„Екстремната десница сака да ја подели и изолира Европа, да ја направи ранлива и ослабена одвнатре. Па, колеги, тоа нема да се случи со нас. Ќе гласаме против овој предлог за гласање недоверба и затоа што сега е време да покажеме за што навистина се залага Европа: единство во Унијата и со другите партнери низ целиот свет. А тоа значи и со земјите од Меркосур“, кажа Ван Бремпт.
Ирскиот европратеник Били Келехер од групата Обновување исто така кажа дека либералите немаат намера да ја поддржат најновата иницијатива за отповикување на Комисијата.
„Нашиот свет е под сериозна закана, а екстремистите во овој Парламент, водени од чувството на сопствена важност, сакаат да се ослободат од претседателката на Комисијата и целиот нејзин одбор комесари. На нашите граѓани им е потребна функционална извршна власт сега повеќе од кога било. Ако се гласа за отстранување на Фон дер Лаен, кој ќе преговара со американскиот претседател Доналд Трамп во име на сите нас?“, кажа Келехер.
Француската пратеничка од редовите на зелените Мари Тусен изјави дека „Меркосур е некомпатибилен со климатските цели на ЕУ и со ветувањето дадено на граѓаните за праведна зелена транзиција“, но дека Зелените се на мислење дека екстремната десница „нема никаков легитимитет да се претстави како бранител на општото добро бидејќи ги негира климатските промени и ги напаѓа зелените политики“.
Вчера европратениците тесно го поддржаа предлогот Судот на ЕУ да издаде мислење за тоа дали трговскиот договор на ЕУ со Меркосур е компатибилен со европските договори и дали неговите одредби ја ограничуваат Европската Унија да ги спроведува своите политики за животна средина и здравје на потрошувачите.
Европската Унија и земјите од јужноамериканскиот трговски блок потпишаа во саботата во главниот град на Парагвај, Асунсион, историски договор за слободна трговија, кој опфаќа 700 милиони граѓани. Комесарот за трговија на Европската комисија Марош Шефчовиќ во понеделник на дебатата на пленарната седница изјави дека договорот ЕУ-Меркосур „испраќа убедлива порака до светот: ние избираме трговија базирана на правила наместо трговија базирана на моќ, мултилатерализам наместо унилатерализам, заемна корист наместо унилатерални добивки, одржливост наместо експлоатација на природата и градиме сигурни партнерства засновани на пријателство и взаемно почитување“.
Пред потпишувањето, земјите-членки на ЕУ го поддржаа договорот. Франција, Полска, Австрија, Ирска и Унгарија гласаа против.
Но, сега ратификацијата на договорот во Европскиот парламент е одложена до пресудата на Судот на ЕУ.
